E fundit!

08:09 Kronika

E rëndë në Maliq/ Një person vret efektivin e policisë, plagos 1 tjetër

Një ngjarje e rëndë është shënuar këtë të enjte në Maliq, ...

Toro që theu në mes SPAK-un dhe Kushtetutën

17 Shkurt 2025, 11:01, Denoncim Klodian Tomorri

Për ata që janë dashamirës të sportit, epiteti Toro atashohet me një nga futbollistët më të mirë të botës në qarkullim. Lautaro Martinez, sulmuesi argjentinas i Interit, ka sot një vlerë tregu mbi 100 milionë euro dhe është një nga goleadorët më të mirë të Europës.

Por ndërsa El Toro i Bahia Blancas thyen papushim rrjetat e ekipeve kundërshtare, ekziston një Toro në Shqipëri që është edhe më i tmerrshëm se kaq. Ky ka thyer SPAK-un, ligjin, Kushtetutën dhe madje gjithë sistemin juridik të shtetit.

Alban Toro u zgjodh në Këshillin e Lartë Gjyqësor në dhjetor të vitit 2018 si kandidat nga radhët e avokatisë. Por zgjedhja e tij ishtë në kundërshtim flagrant me ligjin. Sipas ligjit për Organet e Qeverisjes së Sistemit të Drejtësisë, kandidatët nga radhët e avokatisë duhet të përmbushnin 14 kritere për t’u zgjedhur në KLGJ.

Njëri prej tyre kërkonte që kandidatët të kishin jo më pak se 15 vjet përvojë pune në profesion si jurist, nga të cilat të paktën 10 vitet e fundit të kishin ushtruar profesionin e avokatit pa ndërprerje. Ky më poshtë është ekstrakti zyrtar që dokumenton historikun profesional të zotit Toro.

Toro që theu në mes SPAK-un dhe Kushtetutën

Sipas ekstraktit, Alban Toro e ka pezulluar aktivitetin e tij si avokat në mars të vitit 2010. E ka aktivizuar atë sërish në tetor të vitit 2011, për ta pezulluar prapë në shkurt 2018. Pra zoti Toro u zgjodh në KLGJ në shkelje flagrante të ligjit, duke mashtruar Kuvendin, pasi nuk i kishte jo dhjetë, por as tetë vite ushtrim të pandërprerë aktiviteti. Kështë Toro theu ligjin.

Por skandali në këtë rast ishte evident dhe shpërtheu gjithandej. Fillimisht në Kuvend. Ulsi Manja, në atë kohë kryetar i Komisionit Kuvendor të Ligjeve, u detyrua t’i drejtohej Këshillit të Lartë të Drejtësisë dhe Këshillit të Lartë Gjyqësor që të shpreheshin mbi mospërputhjen e kushteve të zgjedhshmërisë në detyrë të Alban Toros.

Por KLGJ ia përcolli praktikën Inspektorit të Lartë të Drejtësisë dhe ky i fundit me të drejtë e ktheu mbrapsht, pasi ishte KLGJ që duhet të shprehej. Me këtë ping-pong, kërkesa e Kuvendit u pluhuros në sirtarët e qeverisë së gjyqësorit. Kështu zoti Toro theu sistemin juridik.

Megjithatë nuk mbaroi këtu. Pasi u pa qartë se Toro kishte nga pas një dorë të fuqishme, që e vinte atë mbi ligjin dhe rendin juridik të vendit, në lojë u thirr SPAK si shpresa e fundit për të kthyer KLGJ-në në shinat e ligjshmërisë dhe për të ndëshkuar mashtrimin e Kuvendit.

Zoto Toro u kallëzua në SPAK nga shoqata e avokatëve antikorrupsion. Por pasi e mbajti dosjen më shumë se 1 vit, SPAK e pushoi çështjen me motivacionin se nuk gjeti vepër penale. Ky vendim binte erë të rëndë. Të paktën për gjykatën e posaçme kundër korrupsionit. Kjo e fundit e rrëzoi vendimin e SPAK për mosfillim të hetimeve ndaj anëtarit të Këshillit të Lartë Gjyqësor Alban Toro dhe urdhëroi prokurorinë të regjistrojë procedim penal për “falsifikim dokumentesh”.

Nga viti 2021 dhe deri më sot SPAK nuk kreu asnjë veprim duke e mbajtur dosjen në sirtar, edhe çështja nuk kishte nevojë për hetim fare, por vetëm për një verifikim të thjeshtë në Qendrën Kombëtare të Biznesit. Mbajtja e dosjes peng në SPAK i mundësoi zotit Toro që të bënte mandatin e plotë në radhët e KLGJ-së edhe pse ishte në papajtueshmëri me ligjin dhe kishte mashtruar Kuvendin. Kështu zoti Toro e theu në mes dhe SPAK-un.

Por shfaqja vazhdon. Tani Alban Toro po kandidon për gjyqtar në Gjykatën Kushtetuese. SPAK vazhdon të mos shprehet duke i lënë në fakt rrugën e lirë kandidaturës së Toros që të shkojë në institucionin më të lartë hierarkik të drejtësisë, Gjykatën Kushtetuese.

Një gjyqtar me cen ligjor është ëndrra e të gjithë atyre që duan të shantazhojnë drejtësinë. Dhe ku ka më të interesuar se qeveria për këtë. Skandali i mbivendoset skandalit. Tani zoti Toro po rrezikon të thyejë edhe Kushtetutën.

Pikëpyetjet në këtë rast janë të shumta. Por njëra prej tyre është më e madhe edhe se sa vet paligjshmëria e Toros në KLGJ dhe potencialisht në GJK. Kur SPAK-u ka kurajon dhe godet Erion Veliajn, njeriun e dytë ndoshta më të fuqishëm në radhët e pushtetit, si ka mundësi që ul kokën përpara rastit Toro? Dhe kjo vijon me një tjetër pikëpyetje po kaq të madhe.

Nëse El Toro i Interit vlen 100 milionë euro, sa është vlera tregtare e Toros së drejtësisë shqiptare që i psh*rri të gjitha mbarë; ligjin, Kushtetutën, SPAK-un dhe shtetin?