Kush i ka dhe çfarë fshehin bilancet e "Air Albania"?

4 Shtator 2025, 11:07, Denoncim CNA

Nëpërmjet një investigimi që lindi menjëherë pas publikimit të disa lajmeve spekulative, apo abuzimeve mediatike kryer ndaj "Air Albania"-s, CNA mundi të siguronte të dhëna, të cilat zbardhnin të vërtetën mbi bilancet e kompanisë.

Këto bilance nuk deklaroheshin në QKB, por ato kishin rrjedhur në media.

CNA iu drejtua me e-mail menaxhimit të "Air Albania"-s në Tiranë, por edhe aksionerit kryesor siç është "Turkish Airlines".

Ne publikuam një material të plotë, edhe pse ende pyetjet tona drejtuar "Turkish Airlines" nuk kanë marrë përgjigje.

Investigimi/ Bilancet dhe goditjet ndaj “Air Albania”-s, a qëndron pas “Turkish Airlines”?!
29 Gusht, 10:15

Ndërkohë çështja ngelet ende e hapur pa sqarim të plotë dhe me plot tymnajë.

Duke vijuar hetimin tonë lidhur me mosdeklarimin e bilanceve nga "Air Albania" dhe deklarimin e tyre nga "Turkish Airlines", i cili ende mbetet pa përgjigje, vazhdojnë të lindin të tjera pyetje thelbësore.

Së pari, pse "Turkish Airlines" po qëndron në heshtje?

Çfarë po fshihet pak kësaj heshtjeje?

Si është e mundur që një kompani kaq prestigjioze të mos japë një përgjigje të qartë dhe të saktë për këtë çështje?

Bilancet nuk janë në QKB, por në media

CNA, duke thelluar investigimin, ka mundur të sigurojë të dhëna të tjera se kush qëndron pas përgatitjes së bilanceve në Shqipëri, që nuk janë zyrtarisht, por rrjedhin në media.

Sipas burimeve të CNA-së, gjatë këtyre viteve kompania "Air Albania" ka kontraktuar, siç e quajnë tregu, një nga “Big4” ("Ernst & Young").

Kjo kompani ka marrë përsipër që me shërbimet e saj t’i ofrojë "Air Albania"-s, kthimin e TVSH-së, i cili duhet dorëzuar tek autoritetet tatimore deri më datë 14 të çdo muaji.

-Librin e Blerjeve & Shitjeve të TVSH-së, i cili duhet dorëzuar tek autoritetet tatimore deri më datë 10 të çdo muaji.

-Kthimin e tatimit të mbajtur, i cili duhet dorëzuar deri më datë 20 të çdo muaji.

-Kthimet e tatimit mbi pagat, të cilat duhen dorëzuar deri më datë 20 të çdo muaji.

-Deklaratën vjetore të tatimit mbi të ardhurat e korporatës dhe bilancet financiare, të cilat duhen dorëzuar elektronikisht dhe në kopje të printuar deri më 31 mars të vitit pasardhës.

CNA i është drejtuar më një e-mail zyrtar kompanisë për të marrë përgjigje në lidhje me pyetjet që lindin për pjesën e termave kontraktualë dhe shërbimet që duhet të ofronte "Ernst & Young", e cila përfshin në finale edhe bilancin vjetor të kompanisë, bilance që përfunduan në media, por në fakt ato nuk janë dorëzuar prej vitesh në QKB.

Në e-mailin, të cilin ne i kemi nisur kompanisë që duhet të përgatisë e dorëzojë bilancet, ne i kemi drejtuar këto pyetje:

-Së pari, a i ka përmbushur "Ernst & Young" termat kontraktualë?

-Së dyti, nëse po, cilët janë plotësuar dhe cilët jo?

-Ku janë bilancet e kompanisë, për të cilat ju jeni kontraktuar për t'i përpiluar dhe dorëzuar?

-Cila është marrveshja e "Ernst & Young" dhe Sinan BILEK, CEO-s të emëruar nga "Turkish Airlines", Sinan Dilek, në lidhje me këtë çështje?

-Si është e mundur që "Turkish Airlines" i ka këto bilance (që i deklarojnë në KAP), i ka dhe media, por në Shqiperi nuk janë deklaruar në QKB?

Këto pyetje iu drejtuan zyrtarisht "Ernst & Young", por nuk morëm asnjë përgjigje deri në publikimin e lajmit. CNA do të thellojë më tej investigimin në lidhje me "Air Albania" dhe gjithçka që fshihet pas mosdeklarimit të bilanceve në Shqipëri.

CNA do të vazhdojë me investigimin dhe pyetja që i përmbledh të gjitha është: Si ka mundësi që bilancet publikohen në Turqi, i kanë dhe mediat, por kompania e auditimit nuk kthen përgjigje e nuk i jep dhe nuk i ka QKB apo shteti shqiptar?

Këto bilance publikohen me qëllim të caktuar nga individë që mund të kenë pranuar mbifaturime dhe kanë abuzuar, fakte këto të gjitha që kanë çuar në gjendjen e rënduar financiare të "Air Albania"-s.

Rëndimi i gjendjes financiare të "Air Albania"-s nuk i përket një periudhe disamujore, por është afatgjatë dhe sekreti i tyre janë bilancet, ku brenda tyre ndodhen dhe mbifaturimet e pranuara nga persona, të cilët i kanë pranuar ato duke abuzuar dhe duke e dëmtuar "Air Albania"-n dhe duke i sjellë asaj pasoja të rënda financiare.

CNA do të sjellë më tej të tjera të dhëna, të cilat ne i kemi investiguar dhe i kemi zbërthyer deri në fund./ CNA