web counter
LEXO PA REKLAMA!

SHKARKO APP

App Store
Google Play

E fundit!

x

Viti i ri akademik/ Universiteti i Tiranës mbetet zgjedhja kryesore e maturantëve

28 Gusht 2025, 17:52, Aktualitet CNA
Viti i ri akademik/ Universiteti i Tiranës mbetet zgjedhja kryesore e
Rektori i UT, Prof. Dr. Artan Hoxha


Universiteti i Tiranës vijon të mbetet institucioni kryesor i arsimit të lartë në vend, duke qenë edhe këtë vit zgjedhja kryesore e maturantëve shqiptarë. Në një konferencë për shtyp, Rektori i UT, Prof. Dr. Artan Hoxha, prezantoi shifrat e reja të pranimeve, programet më të kërkuara dhe politikat mbështetëse të universitetit, duke e cilësuar rritjen e aplikimeve si një tregues të besimit gjithnjë e më të madh që të rinjtë kanë te UT.

Rritje e numrit të studentëve dhe programeve

Rektori Hoxha bëri të ditur se këtë vit priten mbi 11 mijë studentë në të tre ciklet e studimit. Nga rreth 20.200 maturantë në shkallë vendi, 60% kanë zgjedhur Universitetin e Tiranës, ndërsa në krahasim me vitin e kaluar janë 160 studentë më shumë që kanë preferuar këtë institucion.

“Ky është një tregues i qartë se studentët shqiptarë po e shohin gjithnjë e më shumë të ardhmen e tyre akademike te Universiteti i Tiranës. Programet tona janë të konsoliduara dhe të përditësuara me zhvillimet e kohës, duke garantuar arsim cilësor dhe mundësi të reja profesionale,” theksoi rektori.

Programet më të kërkuara dhe sfidat

Fushat që po shënojnë rritje këtë vit janë drejtësia, ekonomia, shkencat sociale, historia dhe filologjia. Gjithashtu, interes i lartë po vërehet në shkencat e natyrës dhe teknologjinë e informacionit, të cilat ofrojnë perspektivë të gjerë punësimi dhe kërkim të aplikuar.

Megjithatë, sfidë mbeten programet e mësuesisë, ku interesi është më i ulët, duke reflektuar një prirje të maturantëve për të zgjedhur fusha të tjera më të lidhura me tregun e punës.

Viti i ri akademik/ Universiteti i Tiranës mbetet zgjedhja kryesore e

Mbështetje financiare për studentët

Një nga pikat e forta të Universitetit të Tiranës janë bursat dhe lehtësitë financiare. Vetëm këtë vit akademik:
• 2668 studentë përfitojnë bursë mujore prej 10.000 lekësh,
• studentët e programeve me interes kombëtar përfitojnë bursë deri në 40.000 lekë,
• studentët e ekselencës janë të përjashtuar nga tarifat,
• studentët me notë mesatare 9 paguajnë vetëm gjysmën e tarifës së studimit.

Procesi i regjistrimit dhe ndërkombëtarizimi

Procesi i regjistrimit për këtë vit zhvillohet në dy raunde: i pari me 7 faza dhe i dyti me 5 faza, me fazën e parë që nis që nesër.

Paralelisht, Universiteti i Tiranës po forcon hapjen e tij ndërkombëtare. Ai është pjesë e 12 rrjeteve evropiane të arsimit të lartë dhe së fundmi është bashkuar në një aleancë me 8 universitete prestigjioze të Europës, duke ofruar mbi 20 programe në gjuhë të huaj dhe diploma të dyfishta në bashkëpunim me pesë universitete partnere.

Trajnimi i mësuesve dhe sfida e ligjit për arsimin e lartë

Në përgjigje të pyetjeve të gazetarëve mbi procesin e trajnimit të mësuesve, rektori theksoi se UT ka marrë përsipër në mënyrë të konsoliduar përgatitjen dhe formimin e vazhdueshëm të mësuesve të arsimit parauniversitar, duke krijuar një lidhje më të ngushtë mes shkollës dhe universitetit.

Në lidhje me debatin për ndryshimin e ligjit për arsimin e lartë, Hoxha u shpreh se nuk është koha për një ligj të ri, por për një rishikim të tij pas një analize të plotë: “Ligjet nuk duhen shfuqizuar, por përmirësuar. Ligji për arsimin e lartë ka treguar se i ka rezistuar kohës dhe i është përgjigjur qëllimit për të cilin është miratuar, por pas 10 vitesh zbatim ka ardhur koha për amendime që t’i përgjigjen realitetit të ri të arsimit dhe zhvillimeve që ka përjetuar Shqipëria.”/CNA





Lajmet e fundit nga