Tubacion uji nga Syri i Kaltër në Puglia/ Sazan Guri tregon 4 shkeljet e qeverisë shqiptare

5 Qershor 2023, 20:57, Aktualitet CNA

Tubacion uji nga Syri i Kaltër në Puglia/ Sazan Guri tregon 4 shkeljet

Mediat italiane raportuan pak ditë më parë se qeveria shqiptare ka miratuar projektin e ujësjellësit që do të lidhë Gjirokastrën me me rajonin e Puglias, në Itali.

Për këtë lajm ka reaguar ambientalisti Sazan Guri, i cili bën thirrje për një tryezë shkencore-juridike.

Guri deklaron se ky projekt sjell pasoja në të ardhmen dhe është në kundërshtim me ligjet dhe Konventat ndërkombëtare, të cilat ndalojnë ndryshimin e destinacioneve të ujrave të lumenjve.

Ai shprehet se gjithashtu në këtë vendimmarrje nuk janë përfshirë komunitetete Vlorës, Gjirokastrës, Tepelenës dhe Sarandës. Një tjetër shkelje sipas tij është se nuk janë pyetur grupet e interesit dhe ekspertët përkatës.

Deklarata e plotë:

Thirrje për një tryezë shkencore-juridike.

Sesi të ndihmojmë Kryeministrin e Shqipërisë - njëhërësh dhe popullin shqiptar për sipërmarrjen hidrike ndaj rajonit të Pulias!

Besoj se jemi njojtur me anë të përditshmes gazetë të rëndësishme italiane ‘Corriere dela Serra’ me projektin sesi Qeveria shqiptare në fshehje të plotë dërgon me anë të një tubacioni sasira kolosale për në rajonin e Pulias që nuk është e tipit operacion ndihme për një kohë të caktuar, por një operacion i përhershëm dhe me pasoja në të ardhme, si dhe në kundërshtim me ligjet dhe Konventat ndërkombëtare, të cilat ndalojnë ndryshimin e destinacioneve të ujrave të lumenjve nga lumi në lumë brenda një Shteti, jo më të dërgimit të ujrave të lumenjve në shtete të tjerë?!

Përpos shkeljes së mësipërme, shkeljet vazhdojnë me mospërfshirjen e komuniteteve Vlorë, Gjirokastër, Tepelenë dhe Sarandë në këtë vendimmarje, si dhe me mosinformimin e këtyre komuniteteve, për të cilat Konventat ndërkombëtare si ajo Aarhuz e ratifikuar në Paralmentin shqiptar të detyrojnë që ta kryesh.

Shkelja e katër është se duhet të pyeteshin grupet e interesit dhe ekspertët përkatës, sepse mund të këshillohej vendimmarrja se uji mund të shkonte drejt Italisë në kushte ambalazhimi dhe jo kësisoj që mund të jetë burim konfliktesh dhe luftrash në rast se mund të ngjasë ajo e treta botërore për ujin.

Pyetja dhe shqetësimi është e thjeshtë?

1. Pse Kanadaja që merr qindra kërkesa nga SHBA dhe nuk i jep asnjë pikë uji në këtë model?

2. Pse ishujt Fixhi i japin ujë SHBA në formë amballazhimi?

3. Pse Italia e veriut që ka po aq ujë sa edhe ne, në mos më tepër, dhe nuk ndërmerr vepra të tilla hidrike për drejt këtij rajoni në nevojë?

4. Pse Spanja nuk ndërrmer dot veprime të ujrave të lumenjve të saj që më pas kalojnë në Portugali, si psh ndryshim të destinacioneve të ujrave të lumenjve të përbashkët, ndalim e moskthim të tyre në shtratin e mëparshëm, etj., etj.

Kësisoj, në këto rrethana neve njerëzve të përgjegjshëm të këtij vendi na duhet të mblidhemi për t’iu gjendur me ekspertizën tonë Qeverisë shqiptare, Kryeministrit shqiptar, sepse normal edhe është këshilluar gabim nga të vetët, por ne ndihmojmë Kryeministrin tonë - njëherësh popullin tonë, sepse ndryshe pse të quhemi intelektualë, profesorë, pedagogë, qytetarë të përgjegjshëm!