web counter
LEXO PA REKLAMA!

SHKARKO APP

App Store
Google Play

E fundit!

x

Pse Erion Veliaj kërkon konflikt me prokurorin Ols Dado

24 Janar 2026, 15:18, Aktualitet REDAKSIONALE

Pse Erion Veliaj kërkon konflikt me prokurorin Ols Dado

Më 20 janar të vitit 2026, pra vetëm 4 ditë më parë, kryebashkiaku i arrestuar për 13 akuza të rënda, Erion Veliaj, ka paditur në Gjykatën Administrative prokurorin Ols Dado, duke kërkuar shkarkimin e tij dhe shpalljen e emërimit të tij të paligjshëm.

Në padinë e Veliajt thuhet se prokurori Ols Dado nuk ka plotësuar kriteret ligjore për t’u bërë prokuror në vitin 2008, megjithëse duhet theksuar se Dado ka kaluar me sukses të gjitha shkallët e vetingut dhe emërimi i tij është vlerësuar i ligjshëm nga institucionet përkatëse.

Në fakt, Erion Veliaj po kërkon konflikt me prokurorin Ols Dado, të cilin e ka sulmuar me shpifje, duke lobuar për të nxjerrë të pavërteta rreth tij.

Qëllimi i Veliajt është nxitja e konfliktit që prokurori të tërhiqet. Skenari është i qartë. E gjithë kjo është që Dado ta kallëzojë penalisht Veliajn dhe më pas të tërhiqet nga çështja për konflikt interesi.

Erion Veliaj po kërkon konflikt me prokurorin Ols Dado, pasi ka çuar mashtrimet e tij te kongresmenët dhe senatorët amerikanë.

CNA ka publikuar një raport dhjetëra faqesh ku tregohej se së bashku me vëllain e tij, Arbër Veliajn, kanë paguar 220 mijë dollarë për lobime kundër drejtësisë dhe prokurorit.

Në raportin dorëzuar Departamentit të Drejtësisë rreshtoheshin mashtrimet e Veliajt kundër prokurorit Ols Dado, ku thuhej se ishte zhvillues pronash, anëtar aktiv i partisë autoritare të opozitës.

Mashtrime me okë. E para nuk qëndron, është një mashtrim publik pasi Sali Berisha është një person që po hetohet nga SPAK-u për korrupsion, ndaj të cilit fillimisht u dha masa e sigurisë arrest shtëpie dhe më pas detyrim me paraqitje, ndërkohë që gjyqi vijon dhe përpos faktit që është një nga personazhet që më së shumti ka sulmuar SPAK-un dhe prokurorët.

 

Sa i përket mashtrimit që ishte zhvillues pronash, ky është një mashtrim, në fakt, që vijon prej 160 ditësh, pasi as Erion Veliaj dhe as Mero Baze, gazetari i familjes së kryebashkiakut, nuk kanë publikuar asnjë dokument me firmën e prokurorit dhe as refuzimin me firmën e kryebashkiakut të arrestuar për 5 vepra të rënda penale dhe me 13 akuza mbi kurriz.

Një tjetër mashtrim është se Veliaj e veçon prokurorin Ols Dado sikur të ishte i vetmi që ka hetuar dosjen e tij, kur në fakt pjesë e hetimeve ka qenë dhe prokurori Altin Dumani, në atë kohë drejtuesi i SPAK-ut.

Skemat e Veliajt për të krijuar konflikte kanë një qëllim. Ai kërkon të mos përballet me drejtësinë, me prokurorët e ndershëm, me faktet dhe provat që kanë paraqitur prokurorët, por me procedura dhe teknikalitete i shmanget drejtësisë.

Veliaj ka sulmuar prokurorin Ols Dado, duke shpifur dhe mashtruar duke thënë se është në konflikt interesi, ndërkohë që ende nuk i ka faktuar akuzat e tij.

Dhe, tani ka gjetur Gjykatën Administrative për të bërë një padi për të shkarkuar prokurorin. Pyetja që të lind rrjedhimisht nga këto veprime të Veliajt është se çfarë do të ndodhte nëse të gjithë ata që janë arrestuar apo dënuar të kërkonin shkarkimet e prokurorëve?

Pse Veliaj po e godet prokurorin me padi tani në 2026 dhe s’e ka bërë më herët, para 18 vitesh, kur ka nisur të ushtrojë detyrën e tij si prokuror?

Edhe sikur të ndodhë ekstremi i ekstremeve dhe Ols Dado të mos jetë prokurori i çështjes, po prokurorit Altin Dumani çfarë do t’i bëjë zdromsi, që ka frikë t’i përmendë dhe emrin, pasi siç e theksuam më lart në hetimin e Veliajt ka qenë dhe prokurori Altin Dumani?

Skenari është i thjeshtë, Veliaj ka zgjedhur një mënyrë shumë të pështirë, i shmanget drejtësisë, duke mos u përballur me faktet, por duke sulmuar prokurorin që e ka hetuar./ CNA





Lajmet e fundit nga