Çmimet e biletave në Korçë rriten në mënyrë të papërballueshme/ Sa kushtojnë linjat ndërqytetase

23 Qershor 2022, 13:08, Aktualitet CNA

Çmimet e biletave në Korçë rriten në

Qytetarët në Korçë shprehen të revoltuar në lidhje me rritjen e çmimit të biletave të transportit ndërqytetas, të cilat i cilësojnë si të papërballueshme.

Nëse deri dje udhëtimi nga Korça në Fier kushtonte 1 mijë lekë, tashmë secili prej pasagjerëve do të paguajë 200 lekë më shumë në transportin urban.

"Kjo është llahtari jo rritje, nuk dimë me kë të llafosemi, në kë të mbështetemi. Është shumë e vështirë për të paguar të gjitha detyrimet që ne qytetarët kemi. Po nuk punuan shoferët nuk do të ketë lëvizje sepse edhe nafta sa vjen dhe po ngrihet, nuk e përballojmë dot", - tha një qytetar.

"E papërballueshme! Rrogat nuk janë rritur fare, çmimet kanë vajtur në stratosferë. Vetëm me protesta, të rrëzohet kjo qeveri. Çfarë të bëhet tjetër?" - u shpreh një qytetar tjetër.

Por, gjithashtu rritje ka pësuar bileta edhe për pasagjerët që duan të udhëtojnë nga Korça në Pogradec, të cilët duhet të paguajnë 50 lekë më tepër.

Po ashtu, shoferët paralajmërojnë rritje të çmimit edhe për lidhjen me Devollin, nëse situata me rritjen e çmimeve të karburanteve vijon të ketë tendencë rritjeje.