web counter
LEXO PA REKLAMA!

SHKARKO APP

App Store
Google Play

E fundit!

x

Dumani arsyetoi se nuk mund të shkarkohet/ KPA lë në detyrë prokurorin Gentian Habazaj

17 Tetor 2025, 12:29, Aktualitet CNA
Dumani arsyetoi se nuk mund të shkarkohet/ KPA lë në detyrë
Gentian Habazaj

Kolegji i Posaçëm i Apelimit, KPA shpalli të premten më 17 tetor vendimin për pushimin e çështjes së vetingut të prokurorit Gentian Habazaj, duke lënë në fuqi konfirmimin e tij në detyrë nga Komisioni i Pavarur i Kualifikimit.

Prokurori Gentian Habazaj u konfirmua në detyrë më 31 janar të vitit 2024, pasi Komisioni i Pavarur i Kualifikimit, u bind nga shpjegimet e tij kundër barrës së provës për pamundësinë e prindërve për t’i dhuruar një vlerë rreth 5 milionë lekë në vitin 2003, para fillimit të detyrës, si dhe për blerjen prej tyre të një apartamenti në Tiranë, të përdorur nga subjekti.

Komisioneri Publik, Florian Ballhysa, e ankimoi si të pabazuar vendimin e KPK për Habazajn, duke ngritur shkaqe për pasurinë dhe profesionalizmin.

Drejtuesi i SPAK-ut, Altin Dumani, u qëndroi gjatë parashtrimeve shkaqeve të ankimit dhe kërkesës për shkarkimin nga detyra të prokurorit Gentian Habazaj, lidhur me probleme në kriterin e pasurisë dhe profesionalizmit.

Subjekti i kundërshtoi si të pabazuara shkaqet e ankimit duke argumentuar se nuk mund të penalizohet për pasuri të krijuara nga prindërit para fillimit të detyrës.

Në paraqitjen e konkluzioneve përfundimtare, drejtuesi i SPAK-ut paraqiti konkluzione të ndryshme, duke arsyetuar se pas njohjes me provat dhe shpjegimet e subjektit, konstatimet nuk mund të sjellin shkarkim. Ai kërkoi të martën lënien në fuqi të vendimin të KPK për konfirmimin e Habazajt.

Gjatë shpalljes së vendimit të premten, Kolegji vërejti se në kushtet kur drejtuesi i SPAK-ut ka kërkuar lënien në fuqi, ka sjellë për pasojë lënien e ankimit pa objekt. Sipas KPA, kjo është e njëjtë me heqjen dorë nga ankimi, pasi dedektohet mungesë e interesit të ligjshëm nga ankuesi. Kolegji çmon se për këtë arsye nuk ka me lëndë procedurale, pasi ankimi e ka humbur objektin e tij dhe për këtë arsye, duhet që çështja të pushohet. KPA argumenton se pas pushimit të çështjes, vijimi kontrollit të vendimit të KPK në mungesë të objektit të ankimit, do të përbënte cenim të procesit të rregullt ligjor.

Me shumicë votash, trupi gjykues i KPA vendosi pushimin e çështjes. Ndërkohë, u bë me dije në rastet e pushimit të gjykimit, konsiderohet se vendimi i KPK merr formë të prerë.

Prokurori Gentian Habazaj e ka filluar karrierën e tij në Prokurorinë e Durrësit në vitin 2009 dhe që nga viti 2010 e ushtroi detyrën në prokurorinë e Beratit e në Tiranë. Aktualisht është i komanduar si këshilltar pranë Këshillit të Lartë të Prokurorisë. /Reporter





Lajmet e fundit nga