E fundit!

13:13 Politikë

"Protestat arritje e madhe"/ Rama: Shqipëria e para në rajon për performancën mjedisore, e 46-ta në botë

Kryeministri Edi Rama në një postim të bërë në rrjetet soc...

Zëvendëspresidenti i Turqisë takim me Begajn/ Zbardhen pikat kyçe të diskutimeve

17 Tetor 2025, 10:57, Aktualitet CNA

Zëvendëspresidenti i Turqisë takim me Begajn/ Zbardhen pikat

Presidenti i Republikës, Bajram Begaj, priti sot në një takim zëvendëspresidentin e Turqisë, z. Cevdet Y?lmaz. Biseda mes tyre u fokusua te marrëdhëniet e shkëlqyera midis dy vendeve tona, avancimin e nismave që thellojnë këtë bashkëpunim, si edhe zhvillimet rajonale dhe çështjet e sigurisë.

Gjatë këtij takimi, Presidenti Begaj vlerësoi marrëdhëniet e shkëlqyera dhe miqësore me Turqinë, duke konfirmuar përkushtimin e Shqipërisë për të forcuar me tej partneritetin strategjik.

Ndërsa marrëdhëniet dypalëshe kanë shënuar një bilanc shumë pozitiv, në takim u konfirmua qëndrimi për të ruajtur trendin aktual në aspektin e dialogut politik dhe për të thelluar edhe më tej bashkëpunimin dypalësh ekonomiko-tregtar, të investimeve, sigurisë dhe stabilitetit.

“Shqipëria, - theksoi Presidenti Begaj, - vlerëson rolin e Turqisë si një partner dhe aleat kyç dhe vlerësoi se ka gjithmonë vend për thellim të bashkëpunimit dypalësh në fusha, si: ekonomia dhe tregtia, bujqësia, investimet, infrastruktura, turizmi, mjedisi dhe çështje të tjera thelbësore.

Gjatë bisedës u theksua edhe bashkëpunimi rajonal me Turqinë në kuadër të nismave rajonale, si: Bashkëpunimi Ekonomik i Detit të Zi dhe Procesit të Bashkëpunimit të Europës Juglindore (SEECP).

Kreu i Shtetit i përcolli numrit dy të Republikës së Turqisë vlerësim për rolin dhe kontributin e Ankarasë zyrtare dhe në mënyrë të veçantë të Presidentit Erdogan në Ballkanin Perëndimor për paqen dhe stabilitetin, si edhe angazhimin për të vijuar këtë bashkëpunim për të ardhmen e rajonit.

Në lidhje me Kosovën, Presidenti i Republikës vlerësoi lobimin e fortë të Turqisë për njohjen dhe anëtarësimin e saj në organizatat rajonale e globale.

Në takim u vlerësuan, gjithashtu, përpjekjet e Turqisë dhe të Presidentit Erdogan në promovimin e dialogut si mundësi për paqen dhe nxitjen e mirëkuptimit të përbashkët e të pranuar gjerësisht, si në luftën Rusi-Ukrainë, edhe në konfliktin në Lindjen e Mesme./ CNA