Yuri Kim, optimiste për të ardhmen e Shqipërisë/ Jemi krenarë, do të bëhet pjesë e BE-së

12 Maj 2022, 20:03, Politikë CNA

Ambasadorja e SHBA-së në Tiranë, Yuri Kim, ka treguar mbrëmjen e sotme se si e sheh Amerika Shqipërinë.

Kim tha në emisionin ?Open? se pavarësisht problematikave që ka në vendin tonë, SHBA-ja është krenare për arritjet e Shqipërisë në 35 vitet e fundit.

Diplomatja amerikane deklaroi se SHBA-ja ka parë se si Shqipëria hoqi dorë nga diktatura komuniste, hyri në NATO, kryesoi OSBE-në dhe se si sot po rreshtohet krah tyre në Këshillin e Sigurimit të OKB-së për të dhënë mesazhe pro Ukrainës.

Ajo theksoi gjithashtu se Shqipëria do të bëhet anëtare e BE-së, ndërsa kërkoi që populli të mos bëhet pesimist e të mos e humbë shpresën.

?Mendoj se ajo që kam vënë re, sidomos këto ditë, është se shqiptarët nuk kanë një imazh të saktë, të përditësuar të vetes së tyre. Mendoj se kur flas me shqiptarët, ju përshkruani vendin tuaj dhe njerëzit tuaj në mënyra të cilat sipas meje tregojnë se ju e shihni veten tuaj nëpërmjet një pasqyre që është e njollosur. Ndaj, si një mike, më lejoni t?ju them çfarë shohim ne: ne shohim një popull i cili është jashtëzakonisht punëtor, të cilët kanë këmbëngulur, të cilët kanë vuajtur, ata kanë vuajtur, 45 vjet diktaturë komuniste të paraprirë nga 500 vjet pushtim nga një perandori. Ne jemi krenarë dhe na bën shumë përshtypje ajo që shqiptarët kanë arritur, sidomos në 35 vitet e fundit. Ju hodhët tutje vargonjtë e diktaturës komuniste. Sfidat mbeten, natyrisht, dhe vendi juaj mund të jetë shumë më tepër sesa është, por mendoni për gjithçka që keni arritur. Mendoni, edhe një herë, faktin që jeni anëtarë të NATO-s; do të bëheni, do të bëheni anëtarë të BE-së dhe çdo shtet anëtar e pranon se populli shqiptar dhe qeveria shqiptare kanë bërë ndryshimet e nevojshme për të qenë anëtarë të plotë të BE-së. Ju keni qenë Kryesues të OSBE-së, një prej organizatave më të rëndësishme të sigurisë në të gjithë Europën. Ju tani uleni, fizikisht, në krahun tonë në Këshillin e Sigurimit të OKB-së, duke drejtuar përgjigjen botërore ndaj pushtimit rus të Ukrainës.

Kjo është një çështje themelore, një sfidë e cila do të ketë pasojat e saj jo vetëm për Europën, por për të gjithë botën, në çfarë bote jetojmë, çfarë rregullash vendosen, çfarë sjelljeje tolerohet, kush do të mbahet përgjegjës, si do të mbahen përgjegjës. Përfaqësuesi juaj në Këshillin e Sigurisë së OKB-së po bën një punë të mrekullueshme në përfaqësimin e vendit tuaj. Ne jemi shumë krenarë. Kur ne shohim këtë vend, ne shohim një vend plot potencial, ne shohim një vend ku kompani si Bechtel, Exxon, Excelerate dhe shumë kompani të tjera duan të jenë këtu. Dhe kjo, jo vetëm sepse kemi një lidhje emocionale. Kompanitë bëjnë llogaritë se ku do të shkojnë për të gjetur forcën më të mirë punëtore dhe kushtet më të mira për fitime, apo jo? Dhe kur ato shohin Shqipërinë, ato shohin një vend ku qartazi ka një forcë punëtore të arsimuar dhe të aftë. Shpresoj që edhe pjesa tjetër e vendit ta kuptojë këtë. Uroj që shqiptarët të vazhdojnë të kenë shpresë sepse edhe ne e kemi atë te ju.

E di që ka disa të cilët duan të dorëzohen, të cilët do të thonë se asgjë nuk ka ndryshuar. Ata hiqen sikur Reforma në Drejtësi ka dështuar. Ata pretendojnë se çdo gjë në Shqipëri është e tmerrshme. Ata pretendojnë se bota nuk mendon shumë për Shqipërinë. Ata janë gabim. Ata e kanë gabim. Ata po ju shpërqendrojnë dhe ajo që po përpiqen të bëjnë është që t?ju vrasin shpresën tuaj. Po përpiqen t?ju vrasin të ardhmen tuaj. Dhe ju nuk duhet ta pranoni këtë. Ju duhet të luftoni. Ju duhet ta mbani shpresën tuaj. Duhet të kujtoni se cilët jeni ? kjo është toka e Skënderbeut. Këmbëngulni! Luftoni!?, deklaroi ndër të tjera Yuri Kim./ CNA.al