Përgjakja e rrugëve nga aksidentet/ Bilanc lufte, në 9 muaj humbën jetën 151 persona

23 Tetor 2021, 06:39, Kronika CNA

Përgjakja e rrugëve nga aksidentet/ Bilanc lufte, në 9 muaj

Çdo ditë në vendin tonë raportohen aksidente, me të plagosur dhe humbje jete. Në raste tragjedish, siç ishte rasti i familjes nga Lezha, ka edhe reagim nga institucionet, ndryshe ato vijojnë normalisht, pavarësisht përgjakjes së rrugëve.

Sipas INSTAT, nëse llogarisim vetëm Shtatorin e 2021, me atë të vitit 2020, ka një rënie të numrit të aksidenteve.

Por nëse krahasojmë nëntëmujorin e vitit 2021, me të njëjtën periudhë të një viti më parë, ka një rritje të frikshme të numrit të aksidenteve.

Në muajin Shtator 2021 numërohen 105 aksidente rrugore nga 138 aksidente të ndodhura në muajin Shtator 2020, duke u ulur me 23,9 %, krahasuar me të njëjtën periudhë të vitit të kaluar.

Nëntëmujori i vitit 2021 paraqitet me një rritje prej 13,4 %, ku numërohen 1.024 aksidente rrugore nga 903 aksidente të ndodhura në nëntëmujorin e vitit 2020.

Sipas INSTAT, në muajin Shtator 2021, numri i të aksidentuarve (të vrarë dhe të plagosur) është 141 persona nga 184 që ishte në të njëjtin muaj të një viti më parë.

Në nëntëmujorin e vitit 2021, numri i të aksidentuarve është 1.391 persona nga 1.164 persona në nëntëmujorin e vitit 2020.

Në muajin Shtator 2021, numri i të vdekurve nga aksidentet rrugore është 7 persona, nga 24 persona të vdekur në të njëjtën periudhë të një viti më parë.

Në nëntëmujorin e vitit 2021, numri i të vdekurve nga aksidentet rrugore është 151 persona nga 138 persona të vdekur në të njëjtën periudhë të një viti më parë.

Në muajin Shtator 2021, aksidentet rrugore, në 84,8 % të rasteve, kanë ndodhur si pasojë e sjelljes së drejtuesit të mjetit.

Numri më i lartë i aksidenteve në këtë periudhë është kryer nga grup-mosha 25?34 vjeç, duke zënë 33,3 % të numrit të aksidenteve gjithsej. Aksidentet në këtë grup-moshë janë ulur me 23,9 %, krahasuar me të njëjtën periudhë të një viti më parë. Në nëntëmujorin e vitit 2021, aksidentet rrugore, në 15,6 % të rasteve, kanë ndodhur si pasojë e sjelljes së këmbësorit. Gjatë kësaj periudhe, numri i aksidenteve sipas sjelljes së këmbësorit është rritur 26,0 %, krahasuar me të njëjtën periudhë të një viti më parë./CNA.al