Çako takon ambasadorin e Japonisë/ Temat që u diskutuan

15 Gusht 2017, 15:44, Aktualitet CNA

Drejtori i Përgjithshëm i Policisë së Shtetit Drejtues Madhor Haki Çako priti në një takim pune ambasadorin e Japonisë në vendin tonë Sh.T.Z Makato Ito, me qëllim diskutimin e çështjeve me interes të përbashkët policor si dhe vendosjen e bashkëpunimit mes dy policive.

Drejtori i Policisë Haki Çako:

Më lejoni t?ju uroj përzemërsisht për misionin tuaj shumë të rëndësishëm në Shqipëri. Qeveria Shqiptare por dhe Policia e Shtetit Shqiptar mirëpret çdo bashkëpunim dhe çdo prezencë të shteteve tona mike, pasi Japonia është një vend mik me Shqipërinë.

Për shkak të largësisë dhe të pozicioneve gjeografike bashkëpunimi ynë midis sektorëve të sigurisë ka qenë më i paktë.

Policia e Shtetit ju ofron sigurinë maksimale për të ushtruar aktivitetin tuaj, si dhe garanton çdo biznesmen apo turist të Japonisë, se në Shqipëri do të ndjeheni të sigurtë.

Në kuadër të anëtarësimit ose të pjesëmarrjes në organizata Ndërkombëtare të Sigurisë, por dhe në INTERPOL dhe një sërë organizatash të tjera, kemi shkëmbyer informacion për çështje të veçanta dhe specifike që mund të kenë ekzistuar.

Policia e Shtetit është e vendosur për të kryer misionin e saj në luftën kundër krimit të organizuar, radikalizmit, por edhe trafiqeve të ndryshme ndërkombëtare, duke realizuar prioritetet tona për anëtarësimin në Bashkimin Europian dhe për të rritur bashkëpunimin me vendet e tjera.

Në këtë kuadër jemi shumë të intersuar që të përforcojmë bashkëpunimin dhe kontaktet edhe me Policinë e Japonisë. Kjo mund të arrihet nëpërmjet vlerësimit tuaj, të vendosim kontakte të drejtpërdrejta, për të shkëmbyer eksperiencat tona, informacione për sigurinë e përbashkët të vendeve tona pse jo dhe në nivel global.

Përsa kohë jeni në Shqipëri, e keni konstatuar që Shqipëria tashmë është një vend shumë i sigurt. Dhe me këtë rast desha t?ju bëja me dije se siguria është maksimale sidomos për bizneset e huaja ose të gjithë partnerët dhe miqtë tanë që vizitojnë apo janë rezident në Shqipëri.

Ambasadori i Japonisë Sh.T.Z Makato ITO:

Ju falënderoj për pritjen, gadishmërinë dhe predispozicionin për të vendosur ura bashkëpunimi mes dy Policive të vendeve tona.

Për bizneset tona që operojnë apo kanë ndërmend të operojnë në Shqipëri, aspekti i sigurisë është shumë i rëndësishëm.

Para se të vija këtu kisha një imazh negativ për Shqipërinë në lidhje me krimin e organizuar, me trafikimin e qenieve njerëzore, me krimin në përgjithësi etj, por në momentin që erdha këtu e ndryshova komplet këtë mendim. Është një vend i sigurt dhe njerëzit janë miqësorë dhe është një vend i qetë, i pastër, jo i errët siç e kisha imagjinuar më parë.

Ambasadori ITO në përfundim të takimit, ka ftuar Drejtorin e Përgjithshëm të Policisë së Shtetit për një vizitë në Japoni, vizitë e cila do shërbejë për të vendosur kontakte e bashkëpunim me Policinë japoneze.