E fundit!

22:38 Aktualitet

Protestojnë prej 26 ditësh/ Qytetarët vijojnë marshimin në rrugët e Tiranës

Prej më shumë se 1 ore, protestuesit vijojnë marshimin në ...

Depozitat në banka në raport me PBB në nivelin më të ulët që nga 2012

15 Mars 2016, 14:37, Ekonomi CNA

Totali i depozitave në banka në raport me Prodhimin e Brendshëm Bruto ra gjatë vitit që shkoi në nivelin më të ulët që nga viti 2012.

Sipas të dhënave zyrtare të Bankës së Shqipërisë depozitat në raport me PBB arritën në 71.8% të PBB-së në fund të vitit 2015 nga 12.7 për qind që ishin më 2014, duke shënuar rënie për të tretin vit radhazi.

Politika monetare agresive e Bankës së Shqipërisë duke e çuar normën bazë të interesit në minimumin historik në vetëm 1.75 për qind, duket se nuk ka ndikuar në rritjen e konsumit. Sipas parashikimeve të Fondit Monetar Ndërkombëtar pritjet për konsumin e vitit 2015 janë negative me vlerë -0.2 %.

Kjo ecuri në konsum është pasqyre edhe në ecurinë e çmimeve të cilat janë më afër deflacionit.

Banka e Shqipërisë ka shpjeguar se agjentët ekonomikë kanë shtuar kërkesën për instrumente më likuide, në prani të rënies së mëtejshme të normave të interesit.

Kursimet pa afat përbëjnë rreth 33.4% të totalit të depozitave në muajin dhjetor, duke shënuar rritje me rreth 5.5 pikë përqindje kundrejt fundit të vitit të kaluar. Paralelisht me zhvendosjen drejt instrumenteve më likuide, individët kanë zhvendosur një pjesë të kursimeve të tyre në instrumente financiare afatgjata, si depozita me afat maturimi mbi dy vjet.

Këto të fundit kanë ruajtur të njëjtin ritëm rritjeje si një vit më parë, duke u zgjeruar me rreth 13 miliardë lekë.

Stoku i depozitave është mbështetur kryesisht nga rritja e depozitave në valutë, ndërsa depozitat në lekë shfaqen me rënie gjatë vitit 2015.

Banka e Shqipërisë pohon se ecuria e depozitave në lekë është ndikuar nga zhvendosjet e kursimeve të individëve në instrumente jashtë sistemit bankar, të cilat ofrohen kryesisht në monedhë vendase dhe me norma interesi më të favorshme. investimet e individëve në letra me vlerë të qeverisë janë rritur me rreth 18 miliardë lekë gjatë vitit 2015./monitor.al