Rreziku nga zjarret e mundshme/ "BMW" tërheq nga tregu makinat elektrike i4 dhe iX 

1 Gusht 2022, 20:20, Tech CNA
Rreziku nga zjarret e mundshme/ "BMW" tërheq nga tregu makinat
Makinë BMW

"BMW" ka tëhequr nga tregu të gjitha makinat elektrike i4 dhe iX të vitit 2022, ndonëse janë në numër të vogël.

Shkak për tërheqjen e tyre është bërë rreziku nga shpërthimi në zjarr i baterive të këtyre automjeteve.

Vendimi për tërheqje mbulon vetëm 83 automjete që janë shitur në SHBA. "BMW" po këshillon pronarët e makinave elektrike që të mos i ngasin ato, t'i parkojnë jashtë ose larg automjeteve dhe strukturave të tjera që mund të marrin flake.

Tregtarët e "BMW" kanë njoftuar se do ta zëvendësojnë baterinë pa pagesë. Ky vendim u mor pasi "BMW" u vu në dijeni për "një incident në terren jo amerikan që përfshinte një 'BMW' i4 eDrive40 të vitit 2022", në muajin prill.

"BMW" thotë se nuk ka marrë asnjë raport për aksidente apo lëndime si pasojë e defektit të baterisë.

"Për fat të mirë, tërheqja prek një numër shumë të vogël automjetesh. Dhe ekipi ynë i marrëdhënieve me klientët tashmë ka kontaktuar në mënyrë proaktive me të gjithë pronarët e automjeteve të prekura për të ofruar informacion dhe ndihmë", tha Jay Hanson, një zëdhënës i "BMW", në një email për “The Verge”.

Zjarret e baterive, megjithëse janë të rralla, mbeten një shqetësim serioz për prodhuesit e automjeteve elektrike. Nevojiten më shumë të dhëna, por studiuesit kanë përcaktuar se shumica dërrmuese e automjeteve elektrike janë në rrezik të ulët për zjarret e baterive./ B.A. – CNA.al

Lajmet e fundit nga