web counter
LEXO PA REKLAMA!

SHKARKO APP

App Store
Google Play

VIDEO/ Daku nis sezonin me gol, Maksuti shënon në debutim

26 Korrik 2026, 19:39, Sport CNA

VIDEO/ Daku nis sezonin me gol, Maksuti shënon në debutim

Futbollistët shqiptarë e kanë nisur me paraqitje pozitive sezonin e ri në elitën e futbollit rus, duke lënë menjëherë gjurmë në javën e parë të kampionatit.

Protagonisti kryesor ishte Mirlind Daku, i cili gjeti rrugën e rrjetës që në ndeshjen hapëse të Rubin Kazanit përballë Krasnodarit.

Sulmuesi i Kombëtares shqiptare realizoi golin e avantazhit në minutën e 12-të. Daku mori topin jashtë zonës, depërtoi mes dy mbrojtësve kundërshtarë dhe përfundoi aksionin me një goditje të saktë në rrjetë, duke i dhënë epërsinë skuadrës së tij.

Sezonin e kaluar, Daku ishte një nga lojtarët më të rëndësishëm të skuadrës, duke shënuar 10 gola në kampionat. Megjithatë, një dëmtim e detyroi të mungonte në pjesën vendimtare të sezonit, duke ndërprerë ritmin e tij. Rikthimi me gol në ndeshjen e parë të edicionit të ri është një sinjal pozitiv, si për lojtarin, ashtu edhe për klubin, që pret ta ketë sërish ndër protagonistët kryesorë gjatë këtij kampionati.

Në këtë përballje, Rubin Kazani u mbështet edhe te futbollistë të tjerë shqiptarë. Nazmi Gripshi dhe Veldin Hoxha u aktivizuan që nga minuta e parë.

Ndërkohë, një tjetër futbollist shqiptar e nisi me gol aventurën e tij në Rusi. Erald Maksuti debutoi me fanellën e Akhmat Groznit në ndeshjen ndaj Lokomotivës së Moskës. Sulmuesi u hodh në fushë në minutën e 78-të dhe vetëm pesë minuta më vonë arriti të gjente rrugën e rrjetës, duke realizuar golin që vulosi barazimin 1-1.

Ky ishte debutimi i shkëlqyer për ish-sulmuesin e Flamurtarit, i cili u transferua te Akhmat gjatë merkatos së verës.

22-vjeçari vinte pas një sezoni pozitiv në aspektin personal, edhe pse Flamurtari nuk arriti të siguronte mbijetesën dhe ra nga kategoria.





Lajmet e fundit nga