web counter
LEXO PA REKLAMA!

SHKARKO APP

App Store
Google Play

E fundit!

x

Ndalimi i peshkimit me rrjetë/ Dëm ekonomik për 120 peshkatarë në Pogradec

24 Prill 2025, 13:36, Sociale CNA

Ndalimi i peshkimit me rrjetë/ Dëm ekonomik për 120

Peshkatarët e liqenit të Pogradecit kanë reaguar sot ndaj ndalimit të peshkimit me rrjetë, të vendosur nga Ministria e Bujqësisë. Ky vendim është marrë për të mbrojtur shumimin e specieve si Kleni, i cili gjatë kësaj periudhe është në fazën e riprodhimit. Por peshkatarët thonë se ndalesa po i dëmton padrejtësisht, pasi ata synojnë kapjen e specieve të tjera si korani, që nuk ndodhen në shumim dhe nuk janë të ndaluara për t’u peshkuar.

Ndalimi i peshkimit me rrjetë/ Dëm ekonomik për 120

"Aktualisht është i ndaluar peshkimi i Klenit, Krapit, Çironës dhe Gurnecit, të cilat janë specie të egra që shumohen në liqenin e Pogradecit. Të gjithë ne peshkatarët jemi dakord që këto lloje të mos zihen gjatë periudhës së shumimit. Nëse një peshkatar kapet me ndonjë nga këta peshq, atëherë duhet të ndëshkohet sipas ligjit.

Por puna jonë është e lidhur me koranin, të cilin e kemi peshkuar prej shumë vitesh dhe nuk e kuptojmë se si u krijua kjo situatë këtë vit. Jemi të gjithë të pajisur me licenca, kemi kontrata dhe nuk e dimë pse ndalimi po aplikohet edhe për ne.

Këtë vit na është ndaluar të kapim koranin me rrjetë, ndonëse është një specie që lejohet. Ne jemi peshkatarë me kontratë dhe e dimë që korani ndalohet vetëm në dhjetor – në janar ne i kapim vezët dhe i dorëzojmë pranë qendrës së rritjes së koranit për shtimin e tij, siç e parashikon kontrata",-tha peshkatari Odise Dokollari.

Ndalimi i peshkimit me rrjetë/ Dëm ekonomik për 120

"Ne e kundërshtojmë këtë vendim, sepse nuk ka ndodhur më parë. Gjithmonë kemi qenë të kujdesshëm në punën tonë. Ne kemi peshkuar në thellësi, kemi hedhur rrjeta për koranin, por edhe kur ndonjëherë kapet ndonjë nga speciet e ndaluara, peshkatarët i lëshojnë sërish në liqen.

Tani na kanë lejuar vetëm të peshkojmë me grep, ndërsa me rrjeta nuk na lejohet – dhe me grep nuk kapet asgjë në thellësi. Kjo situatë ndikon drejtpërdrejt te ne, sepse na ka lënë pa bukë. Korani tani ndodhet në sipërfaqe, por grepi nuk e kap dot, ndërsa rrjetat janë të ndaluara",-tha peshkatari Taulant Çorbaxhiu.

Sipas tyre, ndalimi i plotë i peshkimit me rrjetë është i pajustifikuar dhe kërkojnë që të lejohet peshkimi në distanca më të mëdha se 1500 metra nga bregu, ku nuk rrezikohet asnjë specie në shumim.

Ndalimi i peshkimit me rrjetë/ Dëm ekonomik për 120

"Ne, si peshkatarë, nuk kapim as klenin, as krapin – problemi qëndron se për shkak të ndalimit të përgjithshëm për to, tani nuk na lejohet të kapim as koranin. Nëse thuhet që lejohen 1500 metra, ne e bëjmë 2000 – e zbatojmë ligjin, nuk kemi problem me rregullat.

Kërkesa jonë për ministrinë është e qartë: të na lejohet peshkimi i koranit, sepse është i lejuar me ligj dhe ne jemi të pajisur me licenca për këtë qëllim. Kërkojmë të na trajtojnë me drejtësi dhe të na lejojnë të vazhdojmë punën tonë, siç e kemi bërë për vite me radhë",-tha Dokollari.

Në një takim me kryetarin e Bashkisë së Pogradecit, peshkatarët ngritën shqetësimet e tyre dhe vendosën të nisin një peticion drejtuar Ministrisë së Bujqësisë, për të kërkuar ndryshimin e vendimit dhe lejimin e peshkimit të kontrolluar për koranin.

Ndalimi i peshkimit me rrjetë/ Dëm ekonomik për 120

"Bëmë një takim me kryetarin e bashkisë dhe mendoj se përgjigjja ishte pozitive. Kryetari na konfirmoi se do të interesohet pranë përgjegjësve përkatës në ministri, duke dërguar një shkresë zyrtare, dhe se brenda 24 orësh do të na kthehet një përgjigje.

Sot jemi mbledhur vetëm për çështjen e koranit, jo për speciet e tjera, sepse ndryshe nga vitet e kaluara, këtë vit na është ndaluar të kapim koranin me rrjetë dhe lejohet vetëm me grep – gjë që është e pamundur, pasi korani nuk kapet dot në atë mënyrë",-tha Dervishaj.

Ndalimi i peshkimit me rrjetë/ Dëm ekonomik për 120

"Nuk e dimë çfarë do bëjmë më tej. Ne ushqehemi vetëm me peshkim, kjo është e vetmja punë që bëjmë. Në këtë situatë, nuk do kemi asgjë për të shitur dhe për të ushqyer familjet tona. Ne nuk jemi punëtorë sezonalë që shkojmë jashtë vendit – jetesa jonë varet vetëm nga peshkimi. Kemi punën, por nuk po na lënë të punojmë",-tha Çorbaxhiu.

Afro 120 peshkatarë në zonën e Pogradecit varen ekonomikisht nga peshkimi, i cili është burimi i vetëm i të ardhurave për shumë familje, dhe zbatimi i këtij urdhri i vendos ata në një situatë të vështirë./CNA





Lajmet e fundit nga