Nis sot aplikimi për skemat mbështetëse në bujqësi/ Ja detajet e procesit dhe përfituesit

14 Prill 2025, 16:25, Sociale CNA

Nis sot aplikimi për skemat mbështetëse në bujqësi/ Ja

Ditën e sotme ka nisur zyrtarisht aplikimi për skemat kombëtare mbështetëse në sektorin e bujqësisë dhe blegtorisë, të cilat përfshijnë gjithsej tetë skema, mes tyre edhe atë të naftës, që cilësohet si më e madhja dhe më e kërkuara nga fermerët. Aplikimet do të jenë të hapura deri më 30 maj, duke u dhënë kohë të mjaftueshme të gjithë fermerëve për të dorëzuar dokumentacionin e nevojshëm.

Arieta Kanari, përgjegjëse e Sektorit të Shërbimit Këshillimor, thekson se këtë vit ka dy ndryshime të vogla në skemën e naftës. Sipas saj, nuk ka rëndësi kush aplikon i pari, por kush dorëzon dokumentet e plota dhe të rregullta.

Nis sot aplikimi për skemat mbështetëse në bujqësi/ Ja

"Sot fillon aplikimi për skemat kombëtare, janë 8 skema, ajo e blegtorisë, bujqësisë dhe skema më e madhe që kemi është ajo e naftës, për të cilën janë më të interesuar fermerët. Aplikimi fillon që sot dhe zgjat deri në 30 Maj, kemi një periudhë të bollshme për të aplikuar. Nuk është e rëndësishme kush është i pari, por kush aplikon me dokumenta të rregullta ai do të përfitojë i pari.

Tek skema e naftës ka 2 ndryshime të vogla, ku edhe ata që aplikojnë me çertifikatë pronësie, edhe ata që aplikojnë me AMPT (dokumenti i pronësisë), duhet të kenë të bashkangjitur skicat për secilën parcelë. Është dokument shtesë por shumë i nevojshëm për të gjetur parcelat në terren. Një dokument tjetër shtesë është një faturë shitje inputesh ose plehrash kimike, farash fidanë ose faturën e shitjes së prodhimit. Interesi më i lartë për naftën, blegtoria ka një ndryshim të vogël se futen edhe viçat dhe demat, edhe tek pjesa e të imëtave futen edhe meshkujt",-tha Kanari.

Fermerët që kanë aplikuar deri më tani, shprehen të kënaqur me lehtësinë e procedurës, por kritikojnë nivelin e ulët të mbështetjes financiare që ofron shteti. Disa nga fermerët tregojnë se pavarësisht se aplikimi është i njëjtë me vitin e kaluar dhe këtë herë nuk ka pasur vështirësi, mbështetja ekonomike është simbolike.

Nis sot aplikimi për skemat mbështetëse në bujqësi/ Ja

"Kam aplikuar për skemën mbështetëse në blegtori. Kam lopë, 16 kokë. Kam përfituar dhe herët e kaluara. Nuk është një skemë mbështetëse siç është në Maqedoni e Kosovë, ata paguhen më shumë. Ndihma është pak por duam më shumë nga qeveria. Nuk është ndonjë ndihmë e madhe. Nuk kishte vështirësi në aplikim.”

“Duhen dokumenta të tjera, për tokën. Njësoj është si vjet dhe sivjet aplikimi. Herën e parë e patëm vështirë, këtë vit jo. Përfituam edhe vjet, për bletari. Marrim 10 mijë lek të vjetra për koshere. Edhe ja vlen, edhe s'ja vlen. Vlera financiare të ishte më e lartë, jo 10 mijë lek të vjetra. Të paktën siç e kanë shtetet e tjera. E kanë 40€-50€. Me numrin e bletëve që kemi ne, ky çmim është shumë i ulët.”

"Shumë pak është. Nuk ja vlen. Edhe kosheret duan ilaçe, duan sheqer. Janë të shtrenjta" ,-thuhet nga fermerët.

Ndërkohë, një tjetër fermere që ka aplikuar për blegtori, duke pasur në zotërim 18 lopë dhe 8 viça, shprehet më e kënaqur për ndihmën që ka marrë.

Nis sot aplikimi për skemat mbështetëse në bujqësi/ Ja

"Bëra aplikimin për blegtorinë, kam lopë. Kam 18 lopë dhe 8 viça. Gjithmonë kam përfituar, sa herë kam aplikuar. Marr 100 mijë lek të vjetra për lopë. Jam shumë e kënaqur. Dokumentat siç kanë qenë, s'ka patur shtime",-tha ajo.

Nga ky vit, në skemën e blegtorisë është përfshirë edhe mbështetja për viçat dhe demat, si dhe për meshkujt e gjedhëve të imëta, një ndryshim që synon të zgjerojë përfituesit dhe të rrisë efektivitetin e ndihmës. Megjithatë, pavarësisht përpjekjeve të institucioneve për të përmirësuar procesin dhe për të shtuar elementë të rinj në skema, shumica e fermerëve kërkojnë një rritje të vlerës financiare të mbështetjes, në mënyrë që të mbulojnë realisht kostot gjithnjë në rritje të prodhimit bujqësor dhe blegtoral./CNA