E fundit!

12:36 Politikë

"Të thuash ke shpirtin e bukur, vetëm ti mund ta bësh"/ Lamallari ironizon Balliun: Je delirant

Ministri i Brendshëm, Besfort Lamallari në interpelancën e...

Kapter Fania niset për luftë, por mashtrohet nga bahçevani i ambasadës

10 Qershor 2022, 18:36, Satire CNA

Kapter Fania niset për luftë, por mashtrohet nga bahçevani i

Kapter Fania shkon në luftë. U paraqit që në mëngjes te ambasada e Ukrainës. Polici te dera ia hapi rrugën menjëherë.

-Më njohe, mo!-qeshi Fania.

-Jo, jo.-i tha polici.

-Po pse ma hape derën e ambasadës?

-Se më ngjave si ukrainas. Me flokë të verdhë, pa vetulla dhe me shikim si të përhumbur.-ia ktheu polici.

-Kam ardhur të regjistrohem për në luftë,-ia nisi Fania.-Kam qenë ushtarak, kam gradën kapter...

Polici këtu qeshi.

-Paske qenë magazinier i konservave me mish viçi?-u tall ai.

-I konservave, por dhe i fishekëve dhe i kallashëve.Nuk i përdorja, ama këto duar i bënin me graso që mos na ndryshkeshin.

Pastaj Fania hyri brenda dhe takoi përfaqësuesin që bënte rekrutimin.

-Në ç’lloj arme do që të regjistrohesh?

-Kudo, veç jo në këmbsori byrazer se nuk kam gjunjë të eci drejt armikut, apo të vrapoj kur ai më sulmon. Po më shumë do më pëlqente të isha magazinier ushqimesh. Se kam përvojë. Konsumoj vetë dhe me shokët se e duam nga një shishe raki në ditë, ama ushtarëve ua jap me kandar farmacie.

Përfaqësuesi i ambasadës e shënoi dhe bëri pyetjen tjetër.

-Po pagën në muaj sa e do?

Këtu Fania u gëlltit. Ngriti kokën lart të bënte shumëzim e pas dy sekondash pyeti:

-Mund të kërkoj diçka tjetër nëse nuk dua pagë mujore?

-Patjetër. Trimat paguhen me flori. Apo tani që Ukraina ka euro pa fund se gjithë bota dhuron për ne.

Fania u mbush me pulla-pulla në surrat nga kënaqësia. Sikur e kishte kapur lija e majmunit.

-Po ja,unë do rri një vit atje. Ju a mund të paguani për mua 12 këstet e borxheve që kam nëpër banka?

-Sigurisht,-i premtoi përfaqësuesi i ambasadës. -Hajde nesër në mëngjes, sill shkresat se sa duhet të paguajmë për ty dhe nisu në luftë pa merak. Dhe po u vrave, mos çaj kokën se paguajmë ne krejt borxhet e tua. Ukraina nuk i le të turpërohen trimat si ty.

Fania doli nga ambasada gjeth, i lehtë si flutur. Ah të kishte bota më shumë luftra, uronte.Te dera sa do pershëndetej me policin dëgjoi:

-Kapter pse nuk hyre brenda në zyrat e ambasadës?

-Mbarova punë me atë zotërinë atje. Qe djalë për së mbari. Më regjistroi dhe më premtoi plot të mira.

-Hahaha,-qeshi polici.-Ai është bahçevani i ambasadës, mo.Komik i madh, tallet me të gjithë. Sidomos ne policëve e kapterëve na ka si bukë e djathë./CNA.al