Kapter Fania e ka ëndërr një tra

27 Maj 2022, 12:02, Satire Politike CNA

Foto ilustruese

Si ai i rrugës së Kombit për shembull.

Vë ca njerëz në kabina prej duralumini dhe pri bileta e grumbullo para. Sheh çdo natë punonjësit e vet atje. Dhe i ndrisin sytë si maçokut kur sheh cironka, sapo i sjellin qeset me kartmonedha.

Por ah, atë çast zgjohet dhe e mbytin hallet. Sheh celularin mbushur me mesazhe. Të gjitha nga bankat.

-Shlyej këstet se do të të marrim median. Nxito! Edhe tri ditë të kanë ngelur!

“Të kisha trarin do të shlyeja gjithë hallet”. Këtë dëshirë ia tha dhe Rakip Zarit. Ai ndreqi syzet që i lëshohen poshtë herë pas here dhe i tha:

-Po vendose dhe ti një tra. Nuk kushton!

-Ku ta vendos? Te dera e banjos e sa herë të shkoj të sh*rros të paguaj?!-u tall kapteri.

Rakip Zari rregulloi edhe një herë syzet e vazhdoi:

-Ti ke një hotel në Durrës. Nuk vijnë shumë turistë ama nga deti kalojnë gjithë ata pushues. Që kapërcejnë nga një plazh te tjetri. Ti pikërisht atje mund të vendosësh një tra. Kush kalon të paguajë për shembull 2 euro.Të qelbëta, të qelbëta, por kur bëhen shumë u del era, ka thënë prefekti Mulleti,-e mbylli shpjegimin Rakipi.

Fania nxori gjuhën jashtë. Shenjë se i pëlqeu propozimi. Dha urdhër me cel e të nesëmen te plazhi u ngrit trari.

I vuri ngjyrën lejla që të dukej si e shtetit, mos i vinin tatimorët.

Tani mban sytë mbërthyer mbi celular. Po pret t’i raportojnë sa para ka fituar nga trari. E mendja i shkon ta ngrejë një tra edhe në Dhërmi, te përroi i fshatit.

Tani atje s’ka ujë, por kalojnë makinat luksoze që zbresin në plazh. Do të marrë me qira një kasolle aty pranë e përroin do e quajë pronë të vetën. Kush kalon, pagon! Slogani i lezetçëm, foli me vete dhe e nxori te lajmet: “Bëhet me pagesë nga 1 qershori kalimi i përroit në Dhërmi!”

Në fytyrë iu shtri një kënaqësi e madhe. Lufta në Ukrainë paska dhe gjëra të mira, ia futi kot. Si gjithnjë se kapter ka qenë e kapter ka ngelë.../CNA.al