LEXO PA REKLAMA!

SHKARKO APP

Bibilushi mban varur në qafë një lugë të vjetër hekuri

10 Maj 2022, 18:48, Satire Politike CNA
Bibilushi mban varur në qafë një lugë të vjetër

E ka lidhur me një spango të kuqe dhe i duket qysh larg. Ka ikur nga mendja, thonë në fshat. Ngaqë flet me vete dhe mban një shkop të trashë duke e vërvitur në ajër. Ca të vegjël tallen me të. E pyesin për lugën:

-Është e kohës së Neolitit? E ke gjetur në gërmimet që bën te baçja e vilës?

Arbeni nuk jep përgjigje. I sheh me sy të egërsuar dhe u turret me shkopin e trashë.

-Kalamaj, kalamaj, po u kapa, do u haj!-sokëllin.

Luga ato çaste i tundet sa majtas-djathtas. E vret te nofulla dhe te gjoksi, por Bibi nuk e heq. Herë pas here e puth, i duket si hajmali.

E vërteta është se fshati nuk po e zgjidh dot dashurinë e tij për lugën.

-Mbase i kujtohet fëmijëria kur mbanim çelsin e shtëpisë në qafë,-shprehen disa.

-Po nuk mbanim lugë ama,-e kundërshtojnë të tjerët.

Kështu, disa ditë deri sa Hysniu, infermieri që i bën Arbenit masazh për hernien, e mësoi të vertetën. Ai ia tha veç Lonit, po Loni si folës radio. Doli te sheshi dhe ua tregoi të gjithëve.

-Së shpejti Ben Dardha do të bëhet shok me Saimir Tahirin në burg. Gëzohet të jenë tek e njëjta qeli. Se ndaj tij nuk ka shumë kontroll ngaqë ka qenë ministër, shpreson Beni. E atë çast ai do të heqë nga qafa lugën që mban varur prej muajsh dhe do të nisë germimin për t?u arratisur. Ashtu si bënte Konti i Montekristos. Atje te romani e mësoi, nuk i sillte kot postieri libra burgu nga Korça.

Sa mbaroi Loni shpjegimin fshati nisi të tallej. Nuk mungoi as shakaja e Vasos, që i çoi një bisht tigani.

-Mbaj këtë në qafë Arbeno, se e hap më shpejt tunelin për t?u arratisur.

Po Arbeni nuk ia pranoi. E qëlloi në këmbë me bishtin e tiganit e gati ia theu kërcirin. Pastaj doli te ballkoni dhe puthte lugën pa pushim. E puthte dhe e fërkonte./CNA.al

Lajmet e fundit nga