Aferat e "5D"/ Veliaj mburr Tushën, Qaton dhe Mollën: Kemi arritur rezultate

6 Prill 2024, 12:37, Politikë CNA

Aferat e "5D"/ Veliaj mburr Tushën, Qaton dhe Mollën: Kemi

Erion Veliaj

Kreu i Bashkisë së Tiranës, Erion Veliaj, ka reaguar sërish për arrestimet e drejtorëve të tij, pas hetimeve të SPAK-ut për dosjen "5D".

Veliaj ka pranuar se ka bashkëpunuar me drejtorët e arrestuar, si Redi Molla, Mariglen Qato dhe Taulant Tusha. Madje këta të fundit i ka mburrur se kanë punuar dhe kanë pasur arritje gjatë drejtimit të institucioneve të ndryshme.

Veliaj theksoi se në këtë komunikim bëri një sqarim për "hienat që s’kanë prekur punë me dorë dhe skërmisin dhëmbët me jargë për gjahun e radhës".

Fjala e Erion Veliajt:

Po! Nuk ka asnjë diskutim, që unë kam punuar dhe bashkëpunuar me këta njerëz dhe për sa më takon, e kam vlerësuar punën e tyre në bazë të rezultateve, që flasin vetë në çdo cep të qytetit, për këdo që do t’u referohet arritjeve reale në sektorët që ata kanë drejtuar, në kohën që kanë punuar në Bashkinë e Tiranës. Mariglen Qato ka drejtuar IMT-në nga shtatori 2018 gjer në shtator 2023. Falë punës së tij dhe asaj skuadre është bërë i mundur Bulevardi i Ri, çlirimi i Unazës tek Astiri, lirimi i liqenit nga zaptimet në gjysmën e tij, hapja e terreneve në Kombinat dhe "5 Maji" për lagjet e reja pas tërmetit.

Teksa sot ecim në ato bulevarde, buzë liqenit, apo përgjatë Unazës së Madhe, ne kuptojmë sa punë të dobishme ishin për qytetin, por edhe sa kundërshtarë politikë u ndërzyen ndaj IMT-së sepse kishin lidhur karrierën e tyre me bllokimin e këtyre kantiereve e sabotimin e Tiranës.

Redi Molla ka drejtuar UKT-në në vitet 2016-2020, ku e ktheu një ndërmarrje të falimentuar në të vetmin ujësjellës me bilanc pozitiv në vend, që sot financohet direkt nga bankat ndërkombëtare të zhvillimit dhe që e ktheu Tiranën e vogël nga 7 orë ujë në ditë, ku vaditej misri e thaheshin lagjet, në një qytet 25 herë më të madh në sipërfaqe, me 20 orë ujë mesatarisht, e në shumicën e zonave urbane me 24 orë ujë.

Taulant Tusha ka drejtuar punët publike në Bashkinë e Tiranës gjer vitin e kaluar. Me një përkushtim të jashtëzakonshëm ka ndjekur 24/7 projekte që Tirana i priste prej një shekulli - nga sheshi "Skënderbej", te Pazari i Ri, nga Bulevardi Zogu I, tek Unaza e Vogël, nga Kalaja e Tiranës në qendër, tek ajo e Petrelës në periferi, nga zgjatimi i Lanës, e gjer te Lumi i Tiranës, që përmbyste gjithë njësitë 4, 8, 9 e 11, e gjer te 101 kopshte e çerdhe të rinovuara, e 40 shkolla të reja, nga ‘Kosova’ e ‘Samiu’, gjer te ‘Partizani’ e ‘Çajupi’, ku çdo ditë ulen e rriten 200 mijë fëmijë të kryeqytetit në kushte optimale.

Kjo ishte një pasqyrë e përmbledhur e punës së tyre në bashki dhe e punës sime me ta, përpara se hienat që s’kanë prekur punë me dorë, të skërmisin dhëmbët me jargë për gjahun e radhës./CNA