Po konfirmohet lajmi i CNA-së/ Deputeti i opozitës me parti të re

5 Prill 2024, 16:29, Politikë CNA

Po konfirmohet lajmi i CNA-së/ Deputeti i opozitës me parti të re

Foto ilustruese

Deputeti demokrat Dashnor Sula është treguar kritik në qëndrimet e tij në lidhje me opozitën.

Gjatë një interviste, deputeti është shprehur se ka rezervat e tij dhe në mbledhjet e fundit të partisë nuk ka qenë duke treguar rezervat e tij.

Sula tha se kjo lidhet në mënyrën se si po funksionon PD dhe nuk është në nivelin që kërkohet.

Deputeti demokrat nënvizon se po u bie kambanave të alarmit për zgjedhjet e 2025 dhe nëse opozita nuk reflekton në të gjitha drejtimet atëherë është e kotë.

“Është për t’u vlerësuar nisma për ndryshimet në Kodin Zgjedhor. Ndryshime të vonuara. Produkti që ka prodhuar komisioni ka materiale të rëndësishme. Punët e mira bëhen ngadalë.

Brenda tre javëve ka përfunduar Reforma Ligjore, ndaj kemi një reformë që ka probleme. Ne jemi në limitet e kohës por nuk ka përfunduar koha.

Kemi disa probleme thelbësore ku ODIHR nuk ndërhyn dot, siç është sistemi zgjedhor.

Ashtu siç u bashkëpunua dje për Amnistinë Penale, mund të bashkëpunohet edhe në këtë pjesë.

Zyrtarët e nivelit të lartë nuk përfitojnë nga Amnistia Penale. Nëse nuk do të bëhej kjo, nuk do të isha dakord me Amnistinë.

SPAK-un nuk e demoralizojmë, madje duhet ta inkurajojmë, duhet t’i dalim krah. Punën e SPAK e vlerësoj me 8/10.

Mendoni që po të mos ishte SPAK opozita nuk do të kishte argument për të folur, sepse anëtarë të mazhorancës nuk do të ishin në burg. Fjalët tona do të mbeteshin retorikë.

Në mbledhjen e fundit të grupit të deputetëve të Rithemelimit, nuk kam qenë i pranishëm, madje edhe në disa mbledhje më parë, kam rezervat e mia. Kjo në lidhje me mënyrën si po funksionon PD në tërësi.

Nuk është në nivelin ku kërkohet. Qëllimi im është t’i bie kambanave të alarmit për 2025. Nuk jam profet por duhet që opozita të reflektojë në të gjitha drejtimet, nëse nuk e bën është kot”, është shprehur ai.

Të gjitha këto deklarata dhe qëndrime të Dashnor Sulës po konfirmojnë atë që CNA ka raportuar para disa ditësh, që po krijon një parti të re.

Can raportoi se Sula ka nisur takimet dhe është në kontakt me deputetët e PD-së apo strukturat për përagtitjet e një alternative të re politike.

Nuk dihet një datë e saktë se kur Dashnor Sula do t'i bëjë publike emrin dhe logon e partisë së re./ CNA