Meta nga burgu kërkon votën për zgjedhjet e 11 majit

1 Maj 2025, 14:20, Politikë CNA

Kreu i Partisë së Lirisë, Ilir Meta, nga burgu ka kërkuar votën e shqiptarëve për zgjedhjet e 11 majit.

Meta thotë se 1 maji i ka gjetur punëtorët në Shqipëri me rrogat më të ulëta në Ballkan dhe në Europë, një faktor që ka çuar në shpopullimin e vendit.

Por Meta thotë se programi i PD-ASHM do t’i japë fund dramës së shpopullimit, por edhe do shpërblejë në mënyrë dinjitoze punën dhe njerëzit e punës, do mbështesë me forcë meritokracinë dhe do të subvencionojë në mënyrë të jashtëzakonshme prodhimin vendas, do garantojë një zhvillim të qëndrueshëm ekonomik dhe një Shqipëri si fuqi eksportuese.

“Sot, më 1 Maj, të gjithë ne nuk mund të harrojmë kurrë se me punën, mundin dhe energjinë e tyre, punëtorët kanë një kontribut thelbësor për zhvillimin, mirëqenien dhe përparimin e vendit, si dhe për përballimin e situatave më të vështira ekonomike, me të cilat Shqipëria është përballur ndër vite.

Por, mjerisht, edhe ky 1 Maj i gjen punëtorët në Shqipëri me nivelin më të ulët të pagës në Ballkan dhe në Europë.

Mjerisht, edhe fuqia punëtore më e kualifikuar largohet masivisht, për shkak të kushteve të këqija të punës, mungesës së vlerësimit të meritokracisë dhe mungesës së shpresës.

Puna e keqpaguar, me orë të gjata, pa kontrata të rregullta dhe kontribute pensioni, pa sigurim shëndetësor dhe të drejta për pushim me pagesë, e zhvesh punëtorin nga dinjiteti dhe e vendos në një marrëdhënie shfrytëzimi. Kjo është një situatë kritike, për të cilën Narkoqeveria nuk bën asgjë, sepse i urren dhe i përbuz punëtorët.

Destrukturimi i ekonomisë dhe përqëndrimi i saj tek kullat dhe ndërtimi, që mundësojnë pastrimin masiv të parave të narkotrafikut dhe krimit, si dhe favorizimi i hapur nga Narkoqeveria i oligarkisë zhvatëse, ka thelluar në ekstrem papunësinë, shpopullimin e vendit, mjerimin dhe përjashtimin social. Janë mbyllur qindra mijëra vende pune, është dëmtuar rëndë biznesi i ndershëm, turizmi, bujqësia dhe blegtoria dhe është goditur rëndë mirëqenia e familjeve të thjeshta punëtore.

Me Programin e Shqipërisë Madhështore, ne i japim fund dramës së shpopullimit, por edhe shpërblejmë në mënyrë dinjitoze punën dhe njerëzit e punës, mbështesim me forcë meritokracinë, mbështesim dhe subvencionojmë në mënyrë të jashtëzakonshme prodhimin vendas, garantojmë një zhvillim të qëndrueshëm ekonomik dhe një Shqipëri si fuqi eksportuese.

Në Shqipërinë Madhështore, 1 Maji do të jetë realisht një ditë feste dhe jo më një ditë trishtimi.

VOTO NR.1 – Koalicioni “PD – Aleanca për Shqipërinë Madhështore”

VOTO ILIR METAJ – Qarku Tiranë”, shkruan Meta./ CNA