Mazhoranca, në sinkron/ Sulme të forta ndaj Berishës: Si guxon të vish në parlament

14 Korrik 2022, 18:04, Politikë CNA

Mazhoranca, në sinkron/ Sulme të forta ndaj Berishës: Si guxon

Taulant Balla, Elisa Spiropali, Sali Berisha

Mazhoranca është në sinkron për sa u përket sulmeve ndaj kryetarit të Partisë Demokratike Sali Berisha. Në sallën e parlamentit deputetë, ministra e drejtues të PS-së, në çdo fillim diskutimi nuk hezitojnë ta nisin duke akuzuar dhe sulmuar kryetarin e opozitës Sali Berisha.

Taulant Balla, Elisa Spiropali, Arben Ahmetaj, e shumë të tjerë kryefjalë të diskutimeve të tyre kanë sulmet ndaj Berishës, megjithëse thonë se nuk e njohin politikisht.

Kryetari i Grupit Parlamentarë të PS-së Taulant Balla, duke iu referuar Berishës, u shpreh se, “non-grata i mori emër për emër të gjithë drejtuesit të institucioneve të drejtësisë duke përjashtuar vetëm zotin Kraja”.

Duke ironizuar Berishësn, kreu i grupit të PS-së Balla e ka cilësuar atë si, Djalli, për të cilin kërkoi që SPAK të hetojë dhe ta vendosë përpara drejtësisë, ndërsa i përmendi kompleksin “Partizani” si një skandal të tjetërsimit të pronave dhe korrupsionit.

Ministrja e Marrëdhënieve me Parlamentin, Elisa Spiropali, në fjalën e saj në Kuvend, ka ironizuar bashkimin e Berishës dhe Metës, duke thënë se “ta gëzoni Ilirin”.

“Koha juaj ka mbaruar me kohë, po mjerë ai që nuk di të ndahet nga politika. Ju ka zënë një hare e madhe, e shoh. Patjetër se mendoni se keni fituar pushtet mbi opozitën po aty do të jeni për aq kohë sa nuk dini të vendosni hare me shoqërinë. Do shtoheni me Ilirin që 5 vite në presidencë ishte aty e me mendje ishte te kryeministria. Ta gëzoni edhe Ilirin se sa më shumë veta të bëheni aq më pak vota do merrni. 'Kuturutë' tuaja nga askundi nuk i dëgjon më njeri. Nuk jemi ne armiqtë tuaj. Armiku i atij që foli ishte drejtësia. Ju keni qenë armiq të kësaj reforme që në gjenezë”, është shprehur Spiropali.

Po kështu i ashpër ka qenë edhe Ministri i Rindërtimit, Arben Ahmetaj, i cili ka hedhur akuza të forta kundër kreut të PD-së Sali Berisha. Nga foltorja e Kuvendit, Ahmetaj akuzoi Sali Berishën se ka vrarë më shumë se pandemia në Shqipëri. Ai i ka përmendur ish-kryeministrit vitin 94’, duke e akuzuar se ka thyer embargon dhe ka furnizuar me naftë makinerinë e luftës së Serbisë.

“Vjen flet ai që ka vrarë më shumë se pandemia. Mbajtësi i vulës së thyerjes së embargos në 94’. Ai ka mundur pandeminë me vdekjen. Prapë guxon vjen këtu. Dikush e përqesh dhe dikush e duartroket. Ai ka vrarë më shumë se pandemia. Nuk duhet të merremi me një njeri që nuk ekziston” tha Arben Ahmetaj./CNA.al