Luli ka kaluar në variantin “Gëzuar”

4 Korrik 2022, 10:06, Politikë CNA

Gati nëntë vjet pasi mori drejtimin e Partisë Demokratike, partisë më të madhe të opozitës, në mars të këtij viti, Lulzim Basha dha dorëheqjen nga drejtimi i kësaj force politike.

Dorëheqja e Lulzim Bashës, erdhi pas një tjetër dështimi të turpshëm, në zgjedhjet e pjesshme vendore të 6 Marsit, ku jo vetëm që nuk mori asnjë bashki, por u katandis forcë e tretë politike.

Ndarja e PD-së, si shpresë për ekzistencën e Lulzim Bashës
2 Maj, 11:16

Pra, pasi shkatërroi Partinë Demokratike dhe përçau demokratët, Lulzim Basha iku me turp nga drejtimi i kësaj force politike.

Por, tashmë Lulzim Bashën, e shohim në një tjetër variant.

Pas ikjes me turp nga drejtimi i PD-së, Lulzim Basha pothuajse është “zhdukur”. Daljet mediatike i ka shumë të rralla, por edhe reagimet në rrjetet sociale, i ka vetëm në variantin “Gëzuar”.

Nëse do të shikosh në faqen e Lulzim Bashës në rrjetet sociale, ajo që bie në sy është se Luli shkruan vetëm “Gëzuar”.

Para pak ditësh shkruante “Gëzuar 2 Korrikun”, sot sërish “Gëzuar 4 Korrikun”, e kështu me radhë. Për Lulzim Bashën tani ka vetëm gëzime, a thua se nuk është ky që shkatërroi Partinë Demokratike.

Luli ka kaluar në variantin “Gëzuar”

A thua nuk është ky që shiti çdo kauzë të opozitës.

A thua nuk është ky që përçau grupin parlamentar të Partisë Demokratike.

A thua nuk është ky që tradhëtoi demokratët, braktisi kuksianët që protestuan për Rrugën e Kombit, braktisi artistët në betejën për Teatrin Kombëtar. Teatri u shemb, ndërsa Basha flinte i qetë në shtëpinë e tij. Braktisi studentët. Premtoi se do ta çonte në Gjykatën Kushtetuese Ligjin për Arsimin e Lartë, por nuk e bëri kurrë. Që në fakt ishte ky ligj që nxori studentët në protestë.

Ishte Lulzim Basha i cili i fali në tavolinë Edi Ramës 61 bashki, duke bojkotuar zgjedhjet vendore të 30 qershorit 2019. Ishte po Lulzim Basha që duke djegur mandatet e deputetëve, duke braktisur Kuvendit, i “dhuroi” Edi Ramës, një mazhorancë kushtetuese.

Dhe ishin po veprimet e Lulzim Bashës, të cilat lanë Partinë Demokratike tre mandate radhazi në opozitë, ndërsa Rilindja gëzon mandatin e tretë qeverisës.