E fundit!

10:31 Aktualitet

"Meta" shfaq probleme/ Përdoruesit e "Facebook" dhe "Instagram" vështirësi në aksesimin e llogarive

Platforma “Meta” ka shfaqur probleme. Qindra mijëra përdor...

21 qershor 2022: Dita e vërtetë e rithemelimit të opozitës shqiptare

21 Qershor 2022, 19:11, Opinione Andi Bejtja

21 qershor 2022: Dita e vërtetë e rithemelimit të opozitës

Andi Bejtja

Bëhen apo nuk bëhen realitet paralajmërimet e Vuçiçit dhe Ramës nesër, për të bojkotuar Samitin e BE-së, libri të cilin duhet ta lexojmë me kujdes tashmë është botuar.

Së pari, arsyet e paralajmërimit të bojkotit hipotetik të Serbisë janë komplet të ndryshme nga ato të Shqipërisë dhe Maqedonisë.

Serbia që është një hap më para në integrimin Europian e ka gati të pamundur të artikulojë dhe publikisht arsyet e bojkotit në këtë samit, ku që në rreshtat e parë të ftesës nga Presidenti Chaarles Michel flitet për situatën e re të krijuar nga Lufta në Ukrainë, për sanksionet ndaj Rusisë, madje përdoret dhe fjala “gjepolitikë”.

Serbia pa dyshim, në këtë Samit ishte vendi që do të hante më shumë shpulla, si për mosvënien e sanksioneve ashtu edhe për faktin që Vuçiçi nuk ka pranuar të dënojë një herë të vetme demonstratat pro Putinit në Beograd. Madje, këtë merak e shprehu dhe Rama në një intervistë të para pak ditëve, ku i bënte thirrje BE-së ta mirëkuptonte më shumë Serbinë.

Arsyet e bojkotit akoma në letër të Shqipërisë dhe të Maqedonisë nëse vazhdon ta ndjekë Tiranën nga pas janë komplet të tjera dhe siç është bërë e ditur nga Rama sot kanë të bëjnë vetëm me veton e Bullgarisë. Pra, tri vende të 'Open Ballkan', që refuzojnë një Samit Europian për arsye të ndryshme dhe që në thelb ndërmarrin një veprim poltik.

Këtë pjesë të librit duhet ta lexojnë me kujdes, kuptohet përveç shqiptarëve edhe amerikanët, ku me gojën e Eskobarit, por dhe zyrtarëve të tjerë, kanë shfaqur shqetësimin që nisma e 'Open Ballkan' të ngelet ngushtësisht një nismë me karakter ekonomik. Sot, me këto paralajmërime që çojnë drejt akteve të pastra politike të 'Open Ballkan', duket se herët a vonë do ta shikojnë me të tjera syze këtë organizatë.

Por, pa dyshim më me kujdes këtë libër që sot ia pamë më qartë se kurrë kopertinën, duhet ta lexojnë shqiptarët dhe sidomos opozita. Sot, në njëfarë mënyre, e pamë atë që e ndienim me kohë: që vazoja ku mbahet flamuri i BE-së në Tiranë është thyer. Dhe me vazo të thyer dhe flamuri BE-së mund të rrëzohet më kollaj, mund të bjerë akoma më poshtë.

Në këtë situatë është jo thjesht taktikë politike, por mbi të gjitha detyrë kombëtare, që pavarësisht nga burokracia e Brukselit, pavarësisht nga vonesat, pavarësisht nga dështimi i planit A apo B të Brukselit për integrimin, dikush duhet ta mbajë më lart Flamurin e BE-së në Tiranë.

Opozita shqiptare, në çdo ngjyrë ku shtrihet është e destinuar të jetë një forcë e pastër Europianiste, sepse dhe përveç të tjerave çdo lojë me pikëpyetje ndaj BE-së është automatikisht e fituar nga Rama-Vuçiç të cilët kanë kohë që e kanë filluar stërvitjen në fushë, madje e kanë dhe çadrën me logon 'Open Ballkan'. Ndaj, në këtë situatë dhe frymëzimet nga Orbanët e Hungarisë apo të Sllovenisë janë të padobishme.

Fatmirësisht, opozita shqiptare e ka një aleat të pastër Europianist në rajon, nga i cili, për shumë arsye mund ta kthejë fytyrën më lehtësisht se me dikë tjetër.

I vetmi vend në Ballkanin Perëndimor ku flamuri i BE-së qëndron në një vazo të pakrisur, është Prishtina. E vetmja shtypshkronjë që mund të shtypë një libër tjetër, ndryshe nga ai që filluam të lexojmë sot me logon 'Open Ballkan', hë për hë, zyrtarisht gjendet vetëm në Prishtinë.

Opozita shqiptare nga sot e tutje o rithemelohet nën këtë dritë, në këtë perspektivë ose nuk ka asnjë shans tjetër. Fushë për lojëra të tjera për opozitën, fatmirësisht apo fatkeqësisht nuk ka.

Ngjiteni vazon e thyer të BE-së në Tiranë.