web counter
LEXO PA REKLAMA!

SHKARKO APP

App Store
Google Play

E fundit!

x

100 mijë firmat e Gonit për drejtësinë, si hakerat iranianë dhe patronazhistët e Ramës

27 Mars 2026, 09:07, Opinione Hysni Gurra

100 mijë firmat e Gonit për drejtësinë, si hakerat
Aksioni i fundit i Agron Shehajt për të mbledhur 100 mijë firma “në mbështetje të SPAK-ut” ngre më shumë pikëpyetje sesa besim.

Përtej paketimit publik, duhet thënë qartë çfarë janë këto firma: mbledhje e të dhënave personale — emër, mbiemër, adresë, numër telefoni. Një proces që nuk prodhon asnjë efekt juridik real, pavarësisht pretendimeve se janë dërguar në SHBA apo në Bruksel. Atyre nuk u shton asnjë peshë.

Atëherë lind pyetja e thjeshtë: për çfarë shërbejnë realisht?

Sepse në praktikë, kjo është një bazë e pastër kontakti. Një listë e gatshme për komunikim politik, mobilizim apo edhe përdorim elektoral. Dhe kur kjo bëhet nën flamurin e “mbrojtjes së drejtësisë”, problemi nuk është thjesht metoda — është sinqeriteti.

Këtu hyn në lojë ajo që duket si thelbi i problemit: hipokrizia. Nuk ka asgjë të keqe të ndërtosh një bazë mbështetësish. Por ka diçka thellësisht problematike kur kjo bëhet duke e shitur si kauzë publike, ndërkohë që interesi real mbetet i pathënë.

Kjo bëhet edhe më e dukshme kur vjen nga një figurë që pretendon të jetë alternativë politike dhe kritikon të tjerët pikërisht për këto forma sjelljeje që bën vetë.

Në fund, çështja nuk është te firmat. As te SPAK-u. Çështja është te mënyra si trajtohen qytetarët: si mbështetës apo si burim të dhënash, mercenarë elektoralë. Sepse ndryshimi mes këtyre të dyjave është më i madh sesa duket.

Thënë më thjesht e më kuptueshëm, aksioni i Agron Shehajt është hiç më pak se ai i organizatës iraniane të hakerave, Home Land Justice, që përlanë të dhënat e shqiptarëve ose ai i patronazhistëve të Edi Ramës.

Dhe po e lë sipas dëshirës së lexuesit që erdhi deri në fund të këtij shënimi të ta vendosë vetë me cilën nga këto metoda përshtatet më shumë aksioni i Gonit./ CNA





Lajmet e fundit nga