LEXO PA REKLAMA!

SHKARKO APP

SHBA: Putini ende synon kontrollin e pjesës më të madhe të Ukrainës

30 Qershor 2022, 08:46, Kosova & Bota CNA
SHBA: Putini ende synon kontrollin e pjesës më të madhe të
Vladimir Putin

Presidenti rus, Vladimir Putin, ende synon të pushtojë pjesën më të madhe të Ukrainës, kanë thënë shërbimet amerikane të inteligjencës.

Megjithatë, trupat ushtarake të Moskës janë dobësuar aq shumë në luftë, saqë zyrtarët amerikanë besojnë se ato mund të bëjnë vetëm përparim të ngadalshëm.

Kjo nënkupton se lufta mund të zgjasë për kohë të gjatë, ka thënë shefja e Agjencisë Kombëtare të Inteligjencës në SHBA, Avril Haines.

Në muajin mars, Moska ka rifokusuar trupat në Donbasin lindor, pasi ka dështuar që të fitojë kontrollin e kryeqytetit ukrainas, Kievit, dhe qyteteve tjera.

Putini ka ende të njëjtat synime që ka pasur në nisje të konfliktit, ka thënë Haines – që të kontrollojë pjesën më të madhe të Ukrainës.

Megjithatë, ajo beson se Rusia ka pak mundësi që të arrijë atë synim në një të ardhme të afërt.

Ne vërejmë mospërputhje në mes të objektivave afatshkurtër të Putinit në këtë fushë dhe kapaciteteve të tij ushtarake, një lloj mospërputhjeje në mes të ambicieve të tij dhe asaj që mund të arrijë ushtria”, ka thënë ajo në një konferencë të Departamentit amerikan të Tregtisë.

Prej kur ka dështuar që të arrijë qëllimin fillestar për pushtim të Kievit, Rusia është fokusuar në kontrollimin e rajonit Donbas, në lindje të Ukrainës.

Në këtë zonë të madhe industriale, Putini pretendon pa ofruar të dhëna, se Ukraina ka kryer gjenocid kundër rusishtfolësve.

Forcat ruse kanë bërë përparim në këtë rajon, duke marrë kontrollin e qytetit të Severodonjeckut, mirëpo përparimi ka qenë i ngadalshëm dhe forcat ukrainase janë duke bërë rezistencë të ashpër.

Luftë e gjatë
Në komentet e saj të para publike prej muajit maj për luftën në Ukrainë, Haines ka sugjeruar se lufta do të mund të zgjasë për një periudhë kohore dhe se “pamja duket goxha e zymtë”.

Ajo ka thënë se agjencitë e inteligjencës kanë tre skenarë se si lufta mund të zhvillohet, dhe me shumë gjasë mund të jetë konflikt me përparim të ngadalshëm.

Tjetri skenar, që ka më pak mundësi të realizimit, është që Rusia të shënojë përparim të madh apo që të ketë stabilizim të frontit të luftës nëse Ukraina bën përparim të vogël.

Kjo nënkupton që Moska mund të bëhet më e varur nga “mjetet asimetrike” për të shënjestruar armiqtë, duke përfshirë sulmet kibernetike dhe përpjekje për të kontrolluar burimet e energjisë apo edhe armët bërthamore.

Haines ka bërë këto komente të mërkurën, pasi liderët e NATO-s janë zotuar se do të qëndrojnë mbrapa Ukrainës për aq sa të ketë nevojë.

Liderët janë pajtuar për rritje të prezencës në Europë, si dhe kanë ftuar Finlandën dhe Suedinë që t’i bashkohen aleancës.

Shefi i NATO-s, Jens Stoltenberg, ka thënë se aleanca ka bërë rishikimin më të madh të politikave prej Luftës së Ftohtë.

Presidenti amerikan Joe Biden është zotuar se NATO-ja do të “forcohet në të gjitha drejtimet – në tokë, ajër dhe det”.

Duke iu përgjigjur mundësisë që Suedia dhe Finlanda të bëhen anëtare të NATO-s, presidenti rus, Vladimir Putin, ka akuzuar aleancën ushtarake për përshkallëzim të qëllimshëm të tensioneve.

Nëse pozicionohen trupa dhe infrastrukturë e NATO-s, Rusia do të jetë e detyruar të përgjigjet”, ka thënë Putini gjatë një vizite në Turkmenistan.

Ndërkohë, Qeveria britanike është zotuar se do të ndajë 1.2 miliard dollarë si ndihmë ushtarake për Ukrainën, duke rritur gati dyfish vlerën e ndihmës.

Vetëm Shtetet e Bashkuara kanë dërguar më shumë ndihmë ushtarake në Ukrainë sesa Britania.

Presidenti ukrainas Volodimir Zelenski, ka thënë se shtetit të tij i duhen rreth 5 miliardë dollarë në muaj, për të financuar luftën kundër Rusisë./rel

Lajmet e fundit nga