Zbulimi amerikan: Lufta Rusi-Ukrainë ka të ngjarë të vazhdojë për një kohë të gjatë

30 Qershor 2022, 08:12, Kosova & Bota CNA
Zbulimi amerikan: Lufta Rusi-Ukrainë ka të ngjarë të
Drejtoresha e Zbulimit Kombëtar, Avril Haines

Agjencitë amerikane të zbulimit vlerësojnë se lufta e Rusisë ndaj Ukrainës ka të ngjarë të vazhdojë për një periudhë të gjatë, por se forcat ruse nuk ka të ngjarë që në një afat të shkurtër të jenë në gjendje të përparojnë përtej rajonit lindor të Ukrainës, tha të mërkurën zyrtarja më e lartë e shërbimeve amerikane të zbulimit.

Drejtoresha e Zbulimit Kombëtar, Avril Haines, tha në një konferencë mbi kontrollet e eksporteve në Uashington se Rusia kontrollon rreth 20% të Ukrainës përgjatë një linjeje konflikti 1,100 kilometra të gjatë.

Por ajo tha se rezistenca e ukrainasve në rajonet e pushtuara nga Rusia po rritet, duke e bërë më të vështirë për Rusinë të përparojë përtej rajonit të Donbasit në lindje, ku ka pushtuar pothuajse të gjithë provincën e Luhanskut, por ka bërë përparim më të vogël në provincën fqinje të Donetskut. Një zgjidhje paqësore nuk ka të ngjarë të arrihet, tha ajo.

Zonja Haines tha se ka më shumë gjasa që konflikti, tani në muajin e tij të pestë, të "mbetet një luftë e rëndë në të cilën rusët do të bëjnë përparime të ngadalshme, por jo të mëdha".

"Me pak fjalë, gjendja mbetet mjaft e zymtë", tha zonja Haines.

Presidenti rus, Vladimir Putin, ende synon të marrë pjesën më të madhe të Ukrainës, tha ajo, megjithëse më herët gjatë luftës, trupat ruse nuk arritën të rrëzonin qeverinë e Presidentit Volodimir Zelenski ose të pushtonin kryeqytetin ukrainas, Kievin.

Të mërkurën, Rusia nisi sulme të reja. Kryebashkiaku i Mykolaivit, një qytet afër Detit të Zi, tha se qyteti u godit nga tetë raketa ruse që shkatërruan një ndërtesë apartamentesh, duke vrarë katër persona dhe duke plagosur pesë të tjerë.

"Ka luftime kudo", tha guvernatori i Luhanskut, Serhiy Haidai. Rusët po pushtojnë qytetin e Lisiçanskit ashtu siç bënë më parë me Sievierodonetskun, tha ai.

Në një fjalim virtual, presidenti Zelenski të martën e quajti Rusinë një "shtet terrorist" dhe i kërkoi OKB-së të dërgojë një komision për të hetuar një sulmin vdekjeprurës me raketa të hënën në një qendër tregtare në qytetin e Kremençukut, në të cilin u vranë të paktën 18 civilë.

Zoti Zelenski tha se në çdo pjesë tjetër të botës, çdo grup që do vriste civilë, siç po bën Rusia në Ukrainë, do të konsiderohej organizatë terroriste.

“Prandaj, ajo që dënohet në nivelin e kriminelëve dhe organizatave kriminale nuk duhet të kalojë e pandëshkuar në nivelin e shtetit, i cili është bërë terrorist”, tha ai për Kremlinin.

Zëvendësambasadori, Dmitri Polianski, tha se fjalimi i Presidentit Zelenski kishte për qëllim të fitonte simpatinë dhe më shumë armë nga pjesëmarrësit në samitin e NATO-s që po mbahet në Madrid.

Zoti Polianski hodhi poshtë gjithashtu akuzat se qendra tregtare në Kremençuk ishte goditur, duke thënë se nuk ishte afër objektivit të Rusisë.

"Në realitet, nuk kishte asnjë sulm në qendrën tregtare", deklaroi zoti Polianski. “Forcat e armatosura ruse përdorën armë precize për të goditur hangarët me armë dhe municione perëndimore të marra nga Shtetet e Bashkuara dhe vendet europiane në zonën e fabrikës së makinerive rrugore në Kremençuk”, shtoi ai./voa

Lajmet e fundit nga