LEXO PA REKLAMA!

SHKARKO APP

Transferimi i llogarive të pagesave mes institucioneve financiare/ Zbatimi nis që nga 1 marsi

27 Shkurt 2023, 09:44, Ekonomi CNA

Transferimi i llogarive të pagesave mes institucioneve financiare/ Zbatimi

Me datë 1 mars do të hyjë në fuqi rregullorja që mundëson transferimin e llogarive të pagesave mes institucioneve financiare në vend.

Kujtojmë se Këshilli Mbikëqyrës i Bankës së Shqipërisë miratoi në mbledhjen e datës 21 dhjetor 2022 “Për krahasueshmërinë e tarifave të lidhura me llogaritë e pagesave dhe për shërbimin e transferimit të llogarive të pagesave”.

Kjo rregullore përcakton kërkesat e autoritetit mbikëqyrës për ofruesit e shërbimeve të pagesave, mbi krahasueshmërinë e tarifave të llogarisë së pagesës, duke u krijuar konsumatorëve mundësinë për të pasur një pasqyrë të plotë të çmimeve/ofertave në treg mbi produktet që lidhen me llogaritë e pagesave, ndërsa parashikon edhe kërkesa për transferimin e llogarive të pagesave, të cilat e bëjnë më të lehtë për konsumatorët, ndryshimin e ofruesit të llogarisë së tyre të pagesës, nëse ofrohet një ofertë më e mirë nga një ofrues tjetër në treg.

Sipas rregullores, Banka e Shqipërisë do të hartojë dhe do të publikojë një listë me të paktën 10 dhe jo më shumë se 20 shërbimet më përfaqësuese të lidhura me një llogari pagese, të cilat janë subjekt i një tarife.

Ofruesit e shërbimeve të pagesave do të raportojnë pranë Bankës së Shqipërisë raporte tremujore mbi tarifat e aplikuara për shërbimet e përfshira në listë.

Sipas rregullores, ofruesit e shërbimeve të pagesave duhet të mundësojnë edhe shërbimin e transferimit midis llogarive të pagesave të mbajtura në të njëjtën monedhë, për të gjithë konsumatorët që hapin ose mbajnë një llogari pagese.

Ky shërbim do të kryhet nga subjekti marrës i shërbimit të pagesës, pas marrjes së autorizimit nga konsumatori. Në rastin kur llogaria zotërohet nga dy ose më shumë persona, autorizimi duhet të merret nga secili prej tyre.

Ofruesi transferues (dhënës) i shërbimit të pagesës ka afat pesë ditë pune për të kryer të gjitha procedurat e mësipërme.

Rregullorja parashikon gjithashtu që të gjitha tarifat që i ngarkohen konsumatorit në këtë proces, qoftë nga subjekti marrës apo transferues, duhet të jenë të arsyeshme dhe të orientuara drejt kostove.

Tarifat dhe të gjitha kushtet e tjera të lidhura me shërbimin e transferimit të llogarive të pagesës duhet të jenë të publikuara dhe të disponueshme në çdo kohë nga të gjitha subjektet e licencuara për shërbime të pagesave./CNA.al

Lajmet e fundit nga