Shitjet e vajit të ullirit arrijnë në 25 mln euro në 8 muaj, rritje vjetore me 665%

20 Shtator 2023, 09:42, Ekonomi CNA

Shitjet e vajit të ullirit arrijnë në 25 mln euro në 8 muaj,

Eksportet e vajit të ullirit arritën vlerën e 25 milionë eurove për 8 muaj, me rritje vjetore 665% në të njëjtën periudhë.

Sezonin e kaluar prodhimi i ullirit dhe vajit njohu rekorde si rrjedhojë e kushteve të mbara të motit dhe hyrjes në prodhim të pemishteve të reja.

Nga ana tjetër prodhuesit më të mëdhenj të ullirit në Europë, Italia dhe Spanja u përballën me thatësirë që çoi në ulje drastike të vajit në tregjet europiane. https://www.monitor.al/thatesira-ne-spanje-e-itali-shpeton-vajin-shqiptar-te-ullirit-2/

Ky ishte një moment i mirë për Shqipërinë, pasi fermerët shqiptarë që kishin akumuluar stoqe prej dy-tri vitesh i eksportuan drejt Italisë. Të ardhurat nga eksportet e vajit të ullirit u shndërruan në burim të mirë të financimi për kultivuesit dhe përpunuesit e vajit të ullirit.

Zv.ministri i Bujqësisë dhe Zhvillimit Rural, Arian Jaupllari, pohoi më herët për “Monitor” se duke marrë në konsideratë efektet e ndryshimeve klimatike që sollën thatësirën në vendet kryesore prodhuese dhe eksportuese të Evropës janë nënshkruar disa marrëveshje bashkëpunimi për nxitjen e eksporteve të ullirit dhe vajit të ullirit në tregun italian dhe evropian.

Burimet nga tregu bëjnë me dije se edhe ky sezon do të jetë i mbarë. Prodhimi nuk pritet të jetë në përmasat e vitit të kaluar, por është i mjaftueshëm për të mos krijuar mungesa në tregun e brendshëm.

Vijimësia e eksportit edhe këtë sezon do të vendoset nga prodhimi në vendet e tjera të Evropës, por përvoja e këtij viti ka qenë pozitive për shumë fabrika të cilat kanë nisur të investojnë për rritjen e kapaciteteve të magazinimit.

Ciklet e prodhimit dhe të trajtimit të ullishteve janë rritur vitet e fundit, por mungojnë investimet në kapacitetet magazinuese. Fabrikat e zakonisht përpunojnë ullirin në favor të fermerëve kundrejt një tarife dhe nuk kanë tankera inoksi për ruajtjen e vajit në kushte optimale. Duke qenë se mungojnë linjat profesionale të magazimit dhe ruajtjes, vaji i ullirit u shit me çmime shume më të ulëta se të vendeve të tjera.

Të dhënat e tregtisë së jashtme tregojnë se një litër vaj ulliri u eksportua mesatarisht me 355 lekë. Gjithsej u eksportuan 7500 tonë vaj me një vlerë rreth 26 miliardë lekë në janar-gusht 2023.

Pavarësisht çmimit të ulët, eksporti i vajit çliroi depot e fermerëve të cilët kishin akumuluar stoqe për tri vite rresht./Monitor.al