E fundit!

09:27 Kronika

E rëndë në Korçë, 66-vjeçari i jep fund jetës

Rreth orës 08:40, në lagjen nr. 10, Korçë, një automjet ti...

Tetë mite historike, të cilat besohen gjerësisht ende sot

30 Shtator 2023, 10:11, Blog CNA

Historia shpesh është e mbushur me mite dhe legjenda të cilat kanë shoqëruar ekzistencën njerëzore përgjatë shekujve, historitë janë trashëguar, modifikuar dhe janë bërë pjesë e ndërgjegjes kolektive të shoqërisë. Edhe pse janë të mahnitshme këto mite mund të errësojnë gjithashtu të vërtetën për të kaluarën tonë.

1. 300 spartanë ndaluan ushtrinë e madhe perse të pushtojë Greqinë

Sipas legjendës, 300 ushtarë spartanë të guximshëm luftuan kundër ushtrisë së mbretit persian Kserks me gati 100.000 luftëtarë. Në fakt, 300 spartanë, duke përfshirë edhe vetë mbretin e tyre Leonidha luftuan me trimëri ndaj persëve. Por ata u ndihmuan nga të paktën 4000-6000 trupa që vinin nga rajonet e Thespias dhe Thebës.

2. Spartanët i hidhnin nga shkëmbinjtë fëmijët e dobët apo të lindur me defekte fizike

Kjo është ajo që ka shkruar Plutarku. Por s’ka asnjë provë arkeologjike që spartanët të kenë vrarë qëllimisht fëmijë. Nëpër malet e krahinës së Lakonisë nuk janë gjetur asnjëherë skelete fëmijësh. Në Spartë, ekzistonte një klasë hiperonësh, qytetarë shumë të varfër ose shumë të dobët. Ata nuk respektoheshin shumë, por nuk u hodhën nga shkëmbinjtë.

3. Piramidat në Egjipt u ndërtuan nga skllevërit

Ose të paktën kështu pretendonte Herodoti. Por ai e kishte gabim. Gërmimet e varreve të ndërtuesve të piramidave kanë treguat se ata ishin njerëz të lirë. Ata ushqeheshin me mish viçi, dhe merrnin rregullisht kujdes mjekësor, dhe u varrosën afër varrit të faraonit, një nder që nuk mund t’u bëhej skllevërve.

4. Neroni dogji Romën

Jo, perandori i çuditshëm nuk e dogji Romën dhe as recitoi ndonjë poezi për shkatërrimin e Trojës nën shoqërinë e një lire teksa shihte nga larg zjarrin. Sipas historianit romak Taciti, që ishte dëshmitar i zjarrit kur ishte fëmijë, Neroni bëri çdo përpjekje për të ndalur flakët. Ai organizoi ekipet e zjarrfikësve dhe siguroi me shpenzimet e tij ushqim dhe strehim për njerëzit që kishin humbur shtëpitë e tyre. Madje pas zjarrit ai hartoi një plan të ri ndërtimi të qytetit dhe e rindërtoi Romën.

5. Vikingët mbanin helmeta me brirë gjatë betejave

Nuk ka asnjë konfirmim që helmetat ushtarake të vikingëve të kishin në krye brirë kafshësh. Sepse kjo gjë ishte jo praktike gjatë betejës dhe mund të shkaktonte lëndime të mëdha. Por ka dëshmi se anëtarët e klerit norvegjez dhe gjerman mbanin ndonjëherë helmeta me brirë në ceremonitë fetare, por jo në beteja.

6. Kaubojët mbanin kapelet e tyre të veçanta
Në fakt banorët e Perëndimit të Egër (Far West) nuk mbanin kapele me cepa të përkulura. Kjo veshje u shpik nga Xhon Stetson në vitin 1865 dhe me kalimin e kohës, hyri shumë në modë. Gjithsesi banorët e vërtetë të Perëndimit të Egër mbanin kryesisht kapele të ngrohta prej lëkure kastori, kapele të sheshta leshi ose sombrero meksikane.

7. Salieri helmoi Mozartin

Ky mit u bë i famshëm nga tragjedia e Pushkinit “Mozarti dhe Salieri”. Por Salieri nuk kishte arsye ta urrente Mozartin. Ai ishte shumë më popullor dhe gëzonte patronazhin e perandorit të Austrisë, ishte mjeshtri i oborrit, merrte një rrogë të lartë dhe frekuentonte qarqet më të larta të shoqërisë vjeneze. Dhe është fakt që Salieri e trajtoi Mozartin shumë mirë dhe e vlerësonte punën e tij. Ndaj kompozitori i madh nuk vdiq nga helmimi, por nga një problem irëndë me veshkat apo nga infeksioni me streptokok.
8. Napoleoni ishte shumë i shkurtër

Karikaturistët britanikë e portretizuan Napoleonin si një njeri shtatshkurtër dhe të shëndoshë. Thuhej se ai ishte vetëm 155 cm i gjatë. Nga ky pretendim buron edhe termi “kompleksi i Napoleonit”. Por në realitet, Napoleoni ishte 169 cm i gjatë. Dhe kjo është një gjatësi mesatare edhe sot, kur njerëzit janë kryesisht më të gjatë./ Përshtatur në shqip nga CNA