Rrëzohet kërkesa e Sali Berishës për përjashtimin e gjyqtares Irena Gjoka

26 Tetor 2023, 15:51, Aktualitet CNA

Rrëzohet kërkesa e Sali Berishës për përjashtimin e

Gjyqtarja Flora Hajredini ka rrëzuar kërkesën e depozituar sot nga pala e ish-kryeministrit Sali Berisha për përjashtimin e gjyqtares Irena Gjoka nga çështja e privatizimit të ish-kompleksit "Partizani".

Kërkesa për përjashtimin e gjyqtares u depozitua mëngesin e sotëm pranë GJKKO-së.

Ndaj ish-kryeministrit Berisha janë vendosur masat e sigurisë “detyrim paraqitje” dhe “ndalim i daljes jashtë shtetit” për akuzën “korrupsion pasiv”.

GJKKO, me kërkesë të Prokurorisë së Posaçme, ka zgjedhur dy avokate për mbrojtjen e ish-kryeministrit Sali Berisha.

Mësohet se janë caktuar avokate nga listat e avokatëve të shtetit pa pagesë, Rabie Cenalia dhe Jalldiz Kastrati.

Cenalia dhe Kastrati u vendosën si avokatet e ish-kryeministrit, pas largimit të Artan Simonit, i cili u zëvendësua për shkak të gjuhës joetike në rrjetet sociale ndaj Berishës.

Kujtojmë se GJKKO caktoi avokat shteti për Berishën për shkak se avokatët e këtij të fundit braktisën seancën.

Ata kishin depozituar një kërkesë që çështja të shqyrtohej nga Gjykata Kushtetuese, por pasi ajo u rrëzua, avokatët debatuan me prokurorët dhe ikën nga seanca.

Kujtojmë se Berisha nuk ka pranuar të shkojë në gjykatë dhe ka deklaruar për mediat se do të paraqitet në SPAK, nëse hiqet masa antiligjore ndaj tij "detyrim paraqitje".

Ai dyshohet se ka konsumuar veprën penale të “Korrupsionit pasiv të funksionarëve të lartë shtetërorë ose të zgjedhurve vendorë”, kryer në bashkëpunim me dhëndrin e tij, Jamarbër Malltezin.

SPAK pretendon se Berisha, në cilësinë e tij si Kryeministër, ka favorizuar procedurat e privatizimit të ish-kompleksit "Partizani" dhe përfitues i drejtpërdrejtë ka qenë Malltezi.

Në tokën e ish-kompleksit "Partizani", Malltezi në cilësinë e investitorit nga shoqëria “Homeplan” sh.p.k., ka kryer ndërtime dhe përfitimet llogariten në shumën 672 miliardë lekë ose 5 milionë euro./CNA