Berisha depoziton kërkesën për përjashtimin e gjyqtares Irena Gjoka

26 Tetor 2023, 10:41, Politikë CNA

Berisha depoziton kërkesën për përjashtimin e gjyqtares

Sali Berisha

Të enjten, ish-kryeministri Sali Berisha ka depozituar në Gjykatën e Posaçme kërkesën për përjashtimin e gjyqtares Irena Gjoka nga çështja për ish-kompleksin "Partizani".

GJKKO bëri me dije për mediat se kjo kërkesë do të shqyrtohet nga gjyqtarja Flora Hajredinaj.

Ndaj ish-kryeministrit Berisha janë vendosur masat e sigurisë “detyrim paraqitje” dhe “ndalim i daljes jashtë shtetit” për akuzën “korrupsion pasiv”.

"Në kryesekretarine e GJKKO-së, ditën e sotme, datë 26.10.2023, ora 09:45, është paraqitur kërkesa e kërkuesit Sali Berisha, me objekt: “Kërkohet përjashtimi i gjyqtares Irena Gjoka”, nga gjykimi i kërkesës penale të paraqitur nga Prokuroria e Posaçme, me objekt marrjen në pyetje të shtetasit nën hetim Sali Berisha, me bazë ligjore nenet 17, 18, 19, 21, 22, 23 të Kodit të Procedurës Penale. Duke qenë se gatishmëria për javën 23.10.2023-29.10.2023, referuar urdhërit të gatishmërisë të zv.Kryetares së gjykatës, i takon gjyqtares Irena Gjoka, kjo kërkesë i ka kaluar për shqyrtim gjyqtares pasardhëse të gatishmërisë, Flora Hajredinaj", thuhet në njoftimin e GJKKO-së.

GJKKO, me kërkesë të Prokurorisë së Posaçme, ka zgjedhur dy avokate për mbrojtjen e ish-kryeministrit Sali Berisha.

Mësohet se janë caktuar avokate nga listat e avokatëve të shtetit pa pagesë, Rabie Cenalia dhe Jalldiz Kastrati.

Cenalia dhe Kastrati u vendosën si avokatet e ish-kryeministrit, pas largimit të Artan Simonit, i cili u zëvendësua për shkak të gjuhës joetike në rrjetet sociale ndaj Berishës.

Kujtojmë se GJKKO caktoi avokat shteti për Berishën për shkak se avokatët e këtij të fundit braktisën seancën.

Ata kishin depozituar një kërkesë që çështja të shqyrtohej nga Gjykata Kushtetuese, por pasi ajo u rrëzua, avokatët debatuan me prokurorët dhe ikën nga seanca.

Kujtojmë se Berisha nuk ka pranuar të shkojë në gjykatë dhe ka deklaruar për mediat se do të paraqitet në SPAK, nëse hiqet masa antiligjore ndaj tij "detyrim paraqitje".

Ai dyshohet se ka konsumuar veprën penale të “Korrupsionit pasiv të funksionarëve të lartë shtetërorë ose të zgjedhurve vendorë”, kryer në bashkëpunim me dhëndrin e tij, Jamarbër Malltezin.

SPAK pretendon se Berisha, në cilësinë e tij si Kryeministër, ka favorizuar procedurat e privatizimit të ish-kompleksit "Partizani" dhe përfitues i drejtpërdrejtë ka qenë Malltezi.

Në tokën e ish-kompleksit "Partizani", Malltezi në cilësinë e investitorit nga shoqëria “Homeplan” sh.p.k., ka kryer ndërtime dhe përfitimet llogariten në shumën 672 miliardë lekë ose 5 milionë euro./CNA