Berisha, nën hetim për korrupsion/ Kumbaro: Respektojmë ndarjen e pushteteve, të shohim me durim punën e drejtësisë

25 Tetor 2023, 09:49, Politikë CNA

Berisha, nën hetim për korrupsion/ Kumbaro: Respektojmë ndarjen e

Ministrja e Turizimit, Mirela Kumbaro, pas mbledhjes së qeverisë nuk komentoi hetimet dhe masën e sigurisë që SPAK ka vendosur ndaj ish-kryeministrit Sali Berisha.

Ajo theksoi se qeveria Rama ka punuar për të ngritur Prokurorinë e Posaçme dhe Gjykatën e Posaçme dhe se kjo mazhorancë respekton ndarjen e pushteteve. Ministrja theksoi më tej se të gjithë duhet të presim me durim dhe besim punën që bëjnë përfaqësuesit e SPAK-ut.

"Ne nuk bëjmë asnjeherë komente, por respektojmë ndarjen e pushteteve. Kjo qeveri, kjo mazhorancë ka qenë ajo që ka themeluar, ka punuar që ky sistem i drejtësisë si Prokuroria e Posaçme dhe Gjykata e Posaçme të funksionojë në kushtet më të mira. Janë veprime procedurale, nuk komentojnë dhe nuk bëj asnjë përjashtimn për rastin në fjalë. Nuk jam as jurist, jam anëtare e qeverisë, kam qenë deputete kur është krijuar ky sistem dhe kemi besuar që ai të funksionojë i lirë. Të respektojmë pavarësinë në sistemin e drejtësisë. Të presim të gjithë me durim dhe besim punën që bëjnë përfaqësuesit e SPAK-ut", u shpreh Kumbaro.

Këtë të mërkurë do të mbahet seanca gjyqësore ndaj ish-kryeministrit Sali Berisha, për çështjen "Partizani". Seanca për ish-kryeministrin është vendosur të mbahet në orën 14:30.

Në seancën e djeshme, Berisha nuk u paraqit në GJKKO, por u përfaqësua nga avokatët e tij, Genc Gjokutaj dhe Sokol Mëngjezi.

Vetë ish-kryeministri deklaroi dje në një konferencë me gazetarët se nuk shkon në gjykatë nëse nuk i hiqet masa “detyrim paraqitje” për të cilën pretendon se është antikushtetuese.

Berisha dyshohet se ka konsumuar veprën penale të “Korrupsionit pasiv të funksionarëve të lartë shtetërorë ose të zgjedhurve vendorë”, kryer në bashkëpunim me dhëndrin e tij, Jamarbër Malltezin.

SPAK pretendon se Berisha, në cilësinë e tij si Kryeministër, ka favorizuar procedurat e privatizimit të ish-kompleksit "Partizani" dhe përfitues i drejtpërdrejtë ka qenë Malltezi.

Në tokën e ish-kompleksit "Partizani", Malltezi në cilësinë e investitorit nga shoqëria “Homeplan” sh.p.k., ka kryer ndërtime dhe përfitimet llogariten në shumën 672 miliardë lekë ose 5 milionë euro./CNA