“Reforma në drejtësi s’ka dështuar”/ Bushati: Ambasadorët amerikanë të mos flasin për lista të zeza e të bardha

13 Shkurt 2023, 22:08, Aktualitet CNA

“Reforma në drejtësi s’ka dështuar”/ Bushati:

Ish-ministri për Europën dhe Punët e Jashtme, Ditmir Bushati, ka sugjeruar që asnjë politikan shqiptar mos t’i bëjë publike keqkuptimet me ambasadorët.

Në një intervistë për gazetarin Endrit Xhafo ai ka folur rreth Reformës në Drejtësi duke pohuar se ka pasur “aksidente" gjatë saj, por ajo nuk ka dështuar.

“Ne kemi një partneritet të veçantë me SHBA-në. Nga eksperienca ime, kam punuar me disa ambasadorë amerikanë, jo për çdo gjë çështje mund t’i kemi parë gjërat në të njëjtën mënyrë, por kam preferuar të jemi të bashkërenduar me ta. Partneritet me SHBA-në është i pazëvendësueshëm.

Pse më duket vetja sikur jam sekretari amerikan i shtetit dhe po pyetem për ambasadorin e vendit tim. Për komunikimin e ambasadorit amerikan në Shqipëri, ka përgjegjësi Shtëpia e Bardhë dhe DASH. Jo për çdo çështje kam qenë në të njëjtën mendje me ambasadorët amerikanë.

Por nuk ia sugjeroj asnjë politikani shqiptar që keqkuptimet me ambasadorin t’i bëjmë publike. Kjo nuk do të thotë që të mos themi fjalën tonë. Duhet të jemi të kujdesshëm. Yuri Kim s’është këtu për të marrë vota dhe për të marrë opinionin e njërit apo tjetrit. Ne u bëmë 33 vjet që e konsiderojmë veten në tranzicion. Në disa raste, na janë dashur ndërkombëtarët amerikanë dhe europianë", u shpreh ai.

Nëpërmjet Reformës në Drejtësi ai tha se Shqipëria ka ecur para dhe gjithashtu ka theksuar se do preferonte që ambasadorët mos të flisnin për lista të bardha e të zeza.

"Gjatë këtyre 33 viteve s’kemi demonstruar një qëndrueshmëri për reformat. Ne kemi pranuar një mekanizëm ndërkombëtar në Kushtetutë, OMN-në. Në vitin 2016 mezi e kam gëlltitur kur e kam votuar. Nëse do më pyesni disa vite më pas, nëse atëherë unë kam qenë më sovranist, unë sot them që prania e ndërkombëtarëve në procesin e vetingut e ka reduktuar dëmin e mundshëm njerëzor.

Ne tradicionalisht kemi këtë raport me SHBA-në. Ky rol i ambasadorit amerikan, pavarësisht emrit, do jetë i tillë përsa kohë ne të kemi një bashkëpronësi në proces. A do maturohemi ne për të zbatuar rregullat e lojës për të shkuar drejt një diplomacie klasike?! Do preferoja që ambasadorët amerikanë në Shqipëri të mos flisnin për lista të zeza, por për lista të bardha. Kur erdhëm në krye të punëve të vendit në 2013-ën kishim fokus reformën në drejtësi. Fondacioni Soros në Tiranë kanë ndihmuar komisionin e Reformës në Drejtësi. Ky proces është i papërfunduar. S’jam partizan i bardh e zinjve. Kjo reformë ishte një nga zotimet tona. Se si u zbatua reforma rrugës, a ka pasur aksidente, ka ndodhur. Por s’ka dështuar. A ka dhënë futet që unë kam besuar? Atëherë unë them jo! Ka momente ngjitje dhe zbritje. E di që njerëzit janë të paduruar.”, tha ai./ CNA.al