Rama ‘hap zemrën’ para ndërkombëtarëve/ Flet për divorcet në martesa

25 Tetor 2023, 16:50, Aktualitet CNA

Rama ‘hap zemrën’ para ndërkombëtarëve/ Flet

Kryeministri Edi Rama

Kryeministri Edi Rama ka “hapur zemrën’ para ndërkombëtarëve.

Në sesionin e hapjes së forumit “Global Gateway”, sfidat aktuale të Europës dhe prioritetet madhore të zhvillimit ai foli lidhur me dështimet që ka pasur në martesa.

Rama u shpreh se ka dështuar disa herë në martesë, por pasi gjeti të duhurën është i lumtur.

Lidhur me këtë ai bëri një paralelizëm midis jetës së tij personale si dhe marrëdhënies mes Bashkimit Europian dhe Shqipërisë ku nënvizoi se Shqipëria pasi dështoi me martesat ne 'lindjen' do të gjejë lumturinë pasi të martohen me Bashkimin Europian.

“Dua të them se kjo hapje që po shohim falë kësaj marrëdhënieje gjithmonë e më të ngushtë me Bashkimin Europian, është thelbësore jo vetëm për të ardhmen e Ballkanit Perëndimor, por dhe për vetë Bashkimin Europian. Jam i sigurt që e njëjta gjë vlen për miqtë tanë afrikanë, e njëjta gjë vlen dhe për të tjerë, që në këtë marrëdhënie është e sigurt që do të gjejnë shumë, shumë arsye për të pyetur veten a ja vlen, por nga ana tjetër nuk ka asgjë që ia vlen më shumë sesa t’i afrohesh gjithmonë e më pranë Bashkimit Europian dhe për ne shqiptarët, që kemi përjetuar një histori, e cila na ka detyruar të bëjmë një sërë martesash të padëshiruara, na besoni, kjo mund të jetë martesa më e vështirë për tu bërë, por e vetmja martesë që ia vlen të kërkohet. Po ju them dhe nga përvoja ime personale. Unë kam pasur disa dështime në martesë, por pasi gjeta atë të duhurën dhe duke qenë i lumtur me të, unë besoj gjithmonë që kjo do të ndodhë edhe me Shqipërinë e të tjerët kur më së fundi të martohen me Bashkimin Europian. Faleminderit shumë!”, tha Rama.

Ai u shpreh: "e gjithë buzëqeshja ime, e gjithë dashuria ime, gjithçkaja ime për Europën dhe Bashkimin Europian është pa kushte".

“Dua që t’ju lë duke ju thënë një fakt të vogël sepse dua që ta dini që e gjithë buzëqeshja ime, e gjithë dashuria ime, gjithçkaja ime për Europën dhe Bashkimin Europian është pa kushte, por nuk është e pa mend. Vetëm mendoni, që ne rrethohemi nga kufijtë e BE dhe fqinjët tanë që janë BE marrin 4517 euro për frymë nga vetë Bashkimi Europian. Ajo çfarë marrim ne në E-në, pa B-në është vetëm 138 euro për frymë. Është një hendek shumë i madh që ne e mbushim me dashuri, që e mbushim me shpresë, që e mbushim me ambicie, që e mbushim me ide shumë të qartë që nuk ka asgjë më të mirë që mund të lëmë pas për fëmijët tanë, por shpresoj fort që ajo çfarë Presidentja e Komisionit dhe ky Komision po punojnë fort për të bërë, do t’ia dalin me sukses sepse në fund të fundit, fëmijët tanë nuk duhet të trashëgojnë vetëm testamentin e dashurisë, por edhe provën që kjo martesë është e vetmja që ia vlen të kesh! Faleminderit!”, tha Rama./ CNA