web counter
LEXO PA REKLAMA!

SHKARKO APP

App Store
Google Play

E fundit!

x

Akuzat dhe masa ndaj Berishës/ Deputeti i PD-së: Prokuroria u nxitua

25 Tetor 2023, 15:18, Aktualitet CNA
Akuzat dhe masa ndaj Berishës/ Deputeti i PD-së: Prokuroria u nxitua
Ish-kryeministri Sali Berisha

Akuzat ndaj ish-kryeministrit Sali Berisha dhe vendosja e masës detyrim me paraqitje për të, është komentuar nga deputeti i PD-së Dashnor Sula si një vendim i nxituar.

Gjatë një interviste deputeti Sula u shpreh se Prokuroria dhe Gjykata duhet të kërkonin autorizim nga Kuvendi.

“Shprehja që qarkullon nëpërmjet juristëve është që dy juristë nuk i gjen në një mendje asnjëherë. Ligji ka interpretim gjithmonë. Por siç e lexoj unë ligjin dhe pa dashur të ndikohem nga Berisha, them se ka një nxitim nga gjykata se si lexohet ligji.

Prokurori dhe gjykatësi udhëhiqet nga kodi i procedurës penale ose civile. Në çfarëdo lloj gjykate madje edhe në Strasburg, gjëja e parë kur një gjykatë shikon është respektimi i procedurës. Nëse kemi shkelje të procedurës nuk i hyn fare themelit të çështjes dhe kjo ndodh në çdo proces. Në rastin konkret, nëse do të rrijë në këtë status quo kjo është e goditshme si çështje në themel. Ky nxitim i tillë nuk kishte pse të ndodhte.

Ne kemi deklaruar se do të votojmë pro çdo lloj kërkese që vjen nga Prokuroria. Në rastin konkret, Kodi i Procedurës Penale, është i qartë. Ndalimi i pasaportës të kërkon autorizimin nga Parlamenti. Ndryshimet janë bërë në vitin 2012 dhe kemi kërkuar që të mos kishte fare imunitet deputeti. Sot organi hetues ka të drejtë të gjurmojë deputetin.

Për kontrollin e banesës dhe masën e sigurimit, këtu është anashkaluar Kuvendi. Nuk e di pse është anashkaluar kjo. Ligjvënësi është parashikuar që edhe në rastet kur Parlamenti nuk i jep autorizim, përsëri në bazë të nenit 289, organi hetues ka të drejtë të vazhdojë hetimin”, theksoi ai.

Më tej, deputeti Sula tha se është kundër çdo lloj emërtimi apo sulmi ndaj SPAK-ut. Ai bëri me dije se nuk do të bëhet mburojë e asnjë politikani. 

Ndër të tjera shtoi se nëse Berisha bën betejë për transparencë do ta mbështesin. 

“Unë vazhdoj t’i mbështes organet e drejtësisë dhe nuk jam dakord me asnjë lloj emërtimi edhe në kohën kur Rama në Asamblenë e PS-së sulmoi SPAK-un. Jam kundër çdo lloj epiteti, çdo lloj gjuhe. Unë nuk do të jem mburojë e asnjë politikani në asnjë lloj rasti.

Nëse e fusim në kanalet politike, humbet sensi dhe e drejta. Mund të ketë persona të caktuar që kanë interesa të sulmojnë ndonjë politikan apo një tjetër. Kjo nuk do të thotë që e gjithë forca politike të përfshihet në këtë debat dhe në këtë luftë.

Qëndrimi i Bardhit dhe yni është që nuk i bëhemi mburojë asnjë personi. Nëse nesër fillon një hetim për një politikan të opozitës që mund të ketë shkelur ligjin, atëherë nuk preket asnjëherë opozita dhe kështu i bie që edhe pozita e sotme kur të jetë nesër në opozitë të mos preket. Nëse Berisha bën betejë për transparencë, ne duhet ta mbështesim”, tha deputeti Dashnor Sula./ CNA





Lajmet e fundit nga