Gjuha denigruese ndaj gazetares/ Kryetarja e AMA-s: E rëndë, të vendoset rregullore për mediat "online"

25 Tetor 2023, 13:24, Aktualitet CNA

Gjuha denigruese ndaj gazetares/ Kryetarja e AMA-s: E rëndë, të

Armela Krasniqi

Kryetarja e Autoritetit të Mediave Audiovizive (AMA), Armela Krasniqi, ka reaguar në lidhje me gjuhën e përdorur ndaj gazetares Afrovita Hysaj, në televizionin "6+1 Vlora", pas publikimit të detajeve për abuzimin seksual dhe drogimin e një 26-vjeçareje.

Nëpërmjet një postimi në rrjetet sociale, Krasniqi dënon gjuhën seksiste dhe fjalorin diskriminues të përdorur ndaj gazetares. Sipas saj, ky rast nxjerr në pah boshllëkun ligjor që ekziston për trajtimin e fenomeneve të tilla që ndeshen rëndom në median "online". Ajo kërkon që të punohet për një rregullore të re për mediat "online".

"Konsideroj të papranueshme gjuhën e përdorur nga portali 6plus1vlora.al, ndaj gazetares Afrovita Hysaj. Dënoj me forcë çdo lloj komunikimi si ky, në të cilin një grua, një gazetare profesioniste, sulmohet duke përdorur fjalor denigrues, gjuhë seksiste, diskriminuese dhe banale. Për pikënisjen që solli këtë devijim komunikimi, sigurisht që do të vendosin organet kompetente. Çfarë unë mund të them me bindje është, se ky është një rast flagrant i lincimit të një gazetareje, i dënueshëm, që shkel mbi dinjitetin e njeriut, lirinë e fjalës dhe çdo kod etike profesionale.

Ky rast – për fat të keq, jo i vetmi – nxjerr edhe një herë në pah boshllëkun ligjor që ekziston për trajtimin e fenomeneve të tilla. Inkurajoj dhe shpreh përkrahjen time për shoqatat e gazetarëve, grupet e interesit dhe çdo individ, në iniciativat ligjore për hartimin e rregulloreve të funksionimit të medias online, por edhe të përmirësimit akoma më tej të kuadrit ligjor ekzistues. Uroj dhe shpreh besimin, që raste të tilla të mos përsëriten dhe çdo profesionist i medias të reflektojë mbi fenomene të tilla”, shprehet Krasniqi.

Gazetarja Afrovita Hysaj raportoi se po tentohet të fshihet një prej autorëve të abuzimit seksual me 26-vjeçaren në Vlorë.

Ndryshe nga policia, e cila raportoi për 3 autorë, (2 në pranga dhe 1 në kërkim), Hysaj tha se në këtë ngjarje është përfshirë edhe një person i katërt, i cili ishte djali i një drejtuesit të televizionit lokal “6+1 Vlora”.

Pas këtij raportimi gazetarja mori një mesazh kërcënues nga pronari i televizionit lokal, ndërsa “6+1 Vlora” publikoi një artikull ku gazetaren e etiketonte me termin e rëndë “Prosti”.

Afrovita Hysaj ka kallëzuar në policinë e Vlorës drejtuesin e televizionit me iniciale A. D. dhe blutë e kanë proceduar penalisht.

Por, policia deklaron se personi i katërt nuk ka qenë i përfshirë në aktin e abuzimit seksual, por ka nxitur 3 të tjerët që t'i japin lëndë narkotike 26-vjeçares./CNA