Problematikat në Tunelin e Murrizit/ Berberi: Vazhdimi i punimeve në “Rrugën e Arbrit” pa kosto shtesë

16 Shtator 2023, 10:39, Aktualitet CNA

Problematikat në Tunelin e Murrizit/ Berberi: Vazhdimi i punimeve në

Foto ilustruese

Kreu i ARRSH-së, Evis Berberi ka folur rreth problematikave në Rrugën e Arbrit, përkatësisht në Tunelin e Murrit ku thotë se punimet po kryhen me kujdes për shkak të kushteve gjeologjike.

Ai thekson se do të zgjatin punimet derisa të arrihet ndërtimi i saktë i Tunelit ndërsa shton se veprat e tjera si ura dhe tunelet kanë përfunduar dhe vijon puna për sistemimin e skarpatave në disa pjesë të rrugës si dhe hedhjen e shtesës së fundit të asfaltit

“Ashtu siç e kemi theksuar edhe më parë, problematika në Rrugën e Arbrit lidhet me gjeologjinë e vështirë që është ndeshur në zonë dhe kryesisht me tunelin e Murrizit.

Aktualisht po punohet në Tunelin e Murrizit, ku për shkak të kushteve gjeologjike dhe të formacionit gjeologjik, punimet po kryhen me kujdes. Koncesionari vlerëson se me këtë progres, koha shtesë për ndërtimit e tunelit do të arrihet.

Ndërkohë që punimet për veprat e tjera të artit, ura dhe tunele kanë përfunduar dhe vijon puna për sistemimin e skarpatave në disa pjesë të rrugës si dhe hedhjen e shtesës së fundit të asfaltit”, tha për Revistën Monitor Berberi.

Kreu i ARRSH-së i është përgjigjur pytjes lidhur me tenderimin veçmas të ndërtimit të skarpatave me vlerë rreth 10 milionë euro.

Berberi u shpreh se nisur nga defromimert dhe çarjet e thella të evidentuara në raportin gjeologjik dhe një investigimi të hollësishëm nga një grup ndërinstitucional, skarpatat ishin të paqëndrueshme dhe në ekuilibër kritik.

“Punimet në skarpata u tenderuan nga ARRSH, si punime të nisura me herët nga ish-DPRR në vitet 2009-2013. Punimet e tenderuara nuk ishin parashikuar në Kontratën Koncesionare/PPP “Rruga e Arbrit”.

Për punimet e bëra në skarpata më herët nga ARRSH, kontrata PPP parashikonte përmirësim, plotësim (pastrim kanalesh, ankera dhe vendosje rrjetë teli për mbrojtjen e tyre).

Nisur nga deformimet dhe çarjet e thella të evidentuara në raportin gjeologjik dhe një investigimi të hollësishëm nga një grup ndërinstitucional, skarpatat ishin të paqëndrueshme dhe në ekuilibër kritik. Mbrojtja e skarpateve do të sillte siguri gjatë kalimit të mjeteve.

Përveç punimeve për mbrojtjen e skarpateve do të bëhet edhe rivitalizimi i tyre, duke shtuar gjelbërimin me mbjelljen e pemëve dhe bimëve që rriten në të zonat përreth”,vijoi më tej Berberi.

Ndë të tjera, kreu i ARRSH-së theksoi se nuk ka një kosto shtesë për ndërtimin e këtij aksi, pasi kostot janë mbuluar nga kompania koncesionare.

“Po patjetër, është inxhinieri i pavarur që harton raporte periodike mbi ecurinë fizike dhe cilësinë e ndërtimit apo mbi respektimin e standardit të objektit sipas projektit të miratuar.

Jo, nuk ka një kosto shtesë në vlerë financiare. Kostot janë mbuluar nga Shoqëria Koncesionare. Vlera e kontratës është vlera e miratuar me VKM-në e vitit 2018”, tha Berberi./ CNA