Pojani feston mes aromës së luleve/ "Festa e Trëndafilave” kthehet në traditë

11 Qershor 2026, 13:03, Aktualitet CNA

Kjo fundjavë e ka gjetur Pojanin të mbushur me ngjyra, aromë dhe atmosferë festive. “Festa e Trëndafilave”, tashmë e kthyer në traditë, mblodhi banorë, nxënës, artistë dhe vizitorë në një aktivitet që promovon bukurinë e natyrës dhe trashëgiminë e zonës.Në një fshat ku pothuajse çdo oborr zbukurohet nga trëndafilat, komuniteti ka vendosur që kjo pasuri të shndërrohet në simbol identiteti dhe krenarie.

Sipas kryetarit të Bashkisë Maliq, Gezim Topçiu, festa është bërë tashmë pjesë e kalendarit kulturor të njësisë administrative të Pojanit.

"Po, në çdo njësi administrative ne kemi festat tona lokale, e Pojani ka një festë të veçantë, 'Festa e Trëndafilave'. Kjo është bërë shkak që gjithë komuniteti i fshatit të kërkojë që të kthehet në një traditë të përvitshme. Ne kemi qenë gjithmonë në mbështetje të tyre. Është një festë që bashkon gjithë komunitetin dhe sjell vetëm gëzim, harmoni dhe aktivitete të ndryshme që shtohen nga viti në vit.Edhe pse jemi një bashki me profil bujqësor-blegtoral, nuk na mungojnë vendet e bukura. Kemi rreth 16 monumente të kategorisë së parë dhe tashmë kanë filluar të shtohen bujtinat dhe atraksionet turistike në zonën e Gorës, Moglicës, Leminotit dhe Çaushlisë. Lugina në drejtim të Gorës dhe Moglicës, e më pas drejt Gramshit, është një nga më të bukurat e Shqipërisë”, shprehet Topçiu.

Organizimi i aktivitetit u mbështet edhe nga Qendra Kulturore “Dhimitër Orgocka”, e cila solli një program artistik me këngë, valle dhe interpretime të ndryshme.

Dhora Shkëmbi, drejtoreshë e Qëndres Kulturore " Dhimitër Orgocka" u shpreh se kjo festë tashmë është kthyer në një traditë.

"Festa e Trëndafilave është kthyer tashmë në një traditë për fshatin e Pojanit. Ne jemi shumë të lumtur që kemi qenë një mbështetje për shkollën e mesme 'Bardhyl Pojani' në këtë aktivitet. Do të ketë këngë, valle dhe muzikë për të gjithë banorët. Kjo festë është pagëzuar kështu sepse çdo shtëpi është e mbushur me trëndafila. Trëndafili është poezi e natyrës”, tha Shkëmbi.

Banorët e zonës e konsiderojnë festën një mënyrë për të ruajtur traditën dhe për të nxitur brezat e rinj të kujdesen për lulet dhe mjedisin.

"Kemi shumë trëndafila në baçe e në oborr. Kjo festë është bërë traditë në fshat dhe është gjithmonë shumë e bukur. Zgjon tek të rinjtë dëshirën për kultivimin e trëndafilit. Të gjithë kanë trëndafila dhe punojnë për t'i shtuar. Është një gjë e bukur dhe ndihemi shumë mirë”, shprehet banori.

Edhe të moshuarit e shohin me kënaqësi vazhdimin e kësaj tradite ndër breza, ku shprehen: “Dikur mbillnim trëndafila të llojeve të ndryshme dhe pothuajse të gjithë i kishim në shtëpi. Edhe të rinjtë duhet ta ndjekin këtë traditë. Është kënaqësi, jeshillëk dhe bukuri. Organizimi i kësaj feste sot është shumë i bukur”

Mes aromës së trëndafilave, gatimeve tradicionale dhe programit artistik, Pojani përcolli edhe këtë vit mesazhin se ruajtja e traditave dhe dashuria për natyrën mbeten vlera që bashkojnë komunitetin dhe e bëjnë këtë festë gjithnjë e më të dashur për banorët dhe vizitorët. /CNA