E fundit!

13:05 Politikë

Kërkesë e dytë nga SPAK për heqjen e imunitetit të Ballukut?/ Përgjigjet Balla

Deputeti i PD-së Belind Këlliçi kërkoi në Kuvend informaci...

Këngëtarja shpërthen ndaj Ramës, Becit dhe Karakaçit/ U jep medaljen e mosmirënjohjes

11 Qershor 2026, 10:06, Aktualitet CNA

Këngëtarja shpërthen ndaj Ramës, Becit dhe

Këngëtarja Barbana Dini ka reaguar publikisht pas diskutimeve të ngritura lidhur me mospërmendjen e emrit të babait të saj, Dashamir Dini, gjatë aktivitetit për 35-vjetorin e Partisë Socialiste në Shkodër.

Në reagimin e saj, Dini shprehet se i ati ka qenë ndër themeluesit e së majtës në Shkodër në vitet ’90 dhe ka drejtuar degën e Partisë Socialiste në periudhën pas ngjarjeve të vitit ’97, duke theksuar kontributin e tij në jetën politike dhe shoqërore të qytetit.

Ajo kujton gjithashtu periudhën e trazuar politike të asaj kohe, duke thënë se familja e saj ka qenë shpesh e përfshirë në situata të vështira, ndërsa i ati, sipas saj, përpiqej të qetësonte konfliktet politike në Shkodër.

Në reagim, këngëtarja kritikon mungesën e vlerësimit për figurat e hershme politike, duke theksuar se kontributi i tyre shpesh lihet në harresë gjatë aktiviteteve zyrtare.

Këngëtarja u ka dhënë medaljen e mosmirënjohjes kryeministrit Edi Rama, kryetarit aktual të Bashkisë Shkodër Benet Beci dhe ministrit Enea Karakaçi, si një mesazh për mosvlerësimin e kontributit të babait të saj për PS-në dhe Shkodrën.

“Në respekt të mesazheve që kam marrë se përse nuk u përmend emri i bashkëthemeluesit të Partisë Socialiste në vitet ’90 dhe Kryetarit të saj në vitet më të vështira pas ’97-ës, Dashamir Dini, babai im, në aktivitetin e mbajtur për 35-vjetorin e Partisë Socialiste në Kalanë e Shkodrës, më duhet të them se:

Jam pothuajse në moshë me partinë e babait tim dhe, kësisoj, dëshmitare unike e kontributit të tij. E kujtoj si sot kur njerëzit e PS-së, të trembur nga ngjarjet e kohës, vinin të strehoheshin në shtëpinë tonë. Ne, aq të vegjël sa ishim, trembeshim se mos po vinin të na merrnin miqtë e babait, ndërsa ai deklaronte se Shkodra ishte mbi çdo parti dhe mbi çdo kryetar partie, dhe vraponte të pajtonte sherrnajat politike.

Si mund të harrohen këto?

Kur shoh lista të hartuara me kujtesë të shkurtër dhe respekt të cunguar, pyes veten sa prej atyre që vendosin kanë qenë aty, në kohët kur duhej guxim dhe jo vetëm prani.

Medaljen ia kanë dhënë prej kohësh qytetarët e Shkodrës, mes të cilëve jetoi dhe nuk u largua kurrë, qyteti për të cilin punoi, shkroi, luftoi dhe dha gjithçka kishte deri në ditën e fundit të jetës së tij.

Ai ishte Kryetar i Partisë Socialiste Shkodër në një kohë kur edhe ta mendoje ishte herezi. Ai ishte shkrimtar, poet, gazetar dhe, mbi të gjitha, qytetar. Një njeri që nuk e përdori kurrë qytetin e tij si trampolinë, por si mision.

Ka mungesa që nuk i mbulon asnjë ceremoni dhe harresa që thonë më shumë për ata që harrojnë sesa për ata që lihen jashtë.

Ndaj sot, në emër të mundit të një jete dhe të shumë jetëve të tjera të lëna pas dore nga shpërndarësit e medaljeve, po ndaj për ju një medalje: MEDALJEN E MOSMIRËNJOHJES (zgjidheni mes jush nëse e doni Gold apo Bronx).

Juve do t’ju ndryshken medaljet, ndërsa atyre burrave do t’u ndriçojë gjithmonë e më shumë qytetaria dhe përkushtimi me të cilin e vaditën këtë qytet.

Edi Rama

@enea karakaci

Benet Beci”, shkruan Dini./ CNA