web counter
LEXO PA REKLAMA!

SHKARKO APP

App Store
Google Play

E fundit!

x

Protestat/ Muka: Po i kërkojnë Ramës të veshë pantallonat se deri tani ka udhëhequr me brekë

11 Qershor 2026, 09:46, Aktualitet CNA

Protestat/ Muka: Po i kërkojnë Ramës të veshë

Pedagogu dhe ish-zëvendësministri i Arsimit, Taulant Muka, ka folur për protestën kundër qeverisë.

Muka është shprehur se në protestë ka grupe nga të gjitha anët. Ai deklaroi se ka ardhur koha që të lihen mënjanë ndasitë dhe të ndërtohet shtet.

Muka theksoi se shoqëria po reagon, po i kërkon një kryeministri të largohet.

“Në radhë të parë, bota po shikon se sa të qytetëruar jemi ne shqiptarët kur jemi të bashkuar. Në atë protestë, ju e keni vënë re, keni qenë vetë në terren, ka nga të gjitha anët. I ke të majtë, i ke të djathtë, të krishterë, ortodoksë, myslimanë, i ke pro familjes, i ke Sorosianë, anti-Sorosianë, janë të gjitha aty. Janë të gjithë aty për të bashkuar për një qëllim të përbashkët që nuk kemi... ka ardhur koha t'i lëmë ndasitë dhe të ndërtojmë shtet.

Ka 36 vite që luajnë dhe nuk kanë ndërtuar shtet. Më së fundmi shoqëria po reagon, po i kërkon një kryeministri: më së fundmi, të kemi dhënë kohë të mjaftueshme të veshësh pantallonat, se deri tani na ke udhëhequr me brekë, sepse e tillë është veshja zyrtare e kryeministrit kur shkon në institucionet ndërkombëtare. Dhe kjo është ajo që unë shoh. Për sa u përket mediave ndërkombëtare, si të thuash, të gjitha rrethanat janë bashkuar në mbështetje të shqiptarëve.

Jo nuk jam i fushës, por mesa duket po. Pra, kemi një përplasje brenda PS-së që është në interesin tonë, kemi një përplasje edhe në Shtetet e Bashkuara të Amerikës dhe institucionet ndërkombëtare që është po në mbështetjen tonë.

Ka marrë një vizibilitet të jashtëzakonshëm. Ne patëm tragjikomedinë e kryeministrit me gazetarët ndërkombëtarë. Ishte fati ynë që sjellja anormale e një kryeministri i dha vizibilitet në gjithë botën.

Pra, sot nuk e kanë parë vetëm shqiptarët, e ka parë gjithë bota se me çfarë shteti kemi të bëjmë. Me një shtet që nuk dëgjon qytetarët, me një shtet që nuk do t'i kuptojë qytetarët, me një shtet që nuk do të zhvillojë potencialin e shqiptarëve.

Dhe ju patët më së fundmi dhe reagimin e Zyrës së Bashkimit Europian që ka dalë në mbështetje të protestave. Pra, të gjitha situatat dalin në favor të, le të themi, kombit shqiptar. Dhe kjo është një situatë që ne të gjithë duhet t'i gëzojmë, të gjithë duhet të bashkohemi sikurse e shohim situatën në terren.

Dhe unë mendoj gjithmonë këtu nuk kemi të bëjmë vetëm me çështje emrash, duhet të largohemi nga miti i emrave, qoftë te Partia Demokratike, qoftë te Partia Socialiste, qoftë edhe ata qytetarë që janë në terren, duhet të fokusohemi te sistemi.

Ne kemi vrarë meritokracinë, kemi vrarë intelektualizmin, në drejtim të partive, në drejtim të institucioneve janë njerëz që përgjithësisht kanë mungesa të theksuara të formimit që i duhet për atë nivel përfaqësimi. Është vrarë, si të thuash, konkurrenca e ndershme në të gjitha institucionet.

I gjithë pushteti është i centralizuar në dy apo tre individë, qoftë në parti, qoftë në shtet. Dhe ka ardhur koha që ne të luftojmë për të ndërtuar një përfaqësim dinjitoz ku çdo institucion është i pavarur. Edhe 'pastruesja' është një institucion, nuk e prek askush. E kjo është e bukura e kësaj proteste”, tha Muka gjatë një interviste./ CNA





Lajmet e fundit nga