E fundit!

13:13 Politikë

"Protestat arritje e madhe"/ Rama: Shqipëria e para në rajon për performancën mjedisore, e 46-ta në botë

Kryeministri Edi Rama në një postim të bërë në rrjetet soc...

Hyn në fuqi rregullorja e re për prokurorët, magjistratët udhëheqës do të përfitojnë 5% shtesë page

4 Nëntor 2025, 13:14, Aktualitet CNA

Hyn në fuqi rregullorja e re për prokurorët, magjistratët

Këshilli i Lartë i Prokurorisë (KLP) ka miratuar rregulloren që saktëson mënyrën e caktimit të prokurorëve si magjistratë udhëheqës në programin e praktikës profesionale.

Në rregullore përcaktohet se magjistratët udhëheqës do të marrin një shtesë page prej 5% mbi pagën mujore bruto fillestare gjatë periudhës që kryejnë këtë detyrë. Në rolin e mentorit, magjistrati udhëheqës do të drejtojë dhe mbështesë kandidatin për magjistrat gjatë praktikës profesionale.

Rregullorja vendos kriteret për përzgjedhjen e tyre, ku sipas së cilës prokurorët që do të përzgjidhen magjistratë duhen të kenë përvoja minimale 5 vjet si prokurorë, vlerësim etik dhe profesional minimal “shumë mirë”, pa masa disiplinore dhe trajnim të përfunduar për magjistratë udhëheqës dhe të mos ketë masa disiplinore.

Gjithashtu, ai duhet të ketë respektuar afatet ligjore për hetimin apo gjykimin e çështjeve gjatë vitit të fundit.

Sipas rregullores së botuar në Fletoren Zyrtare "Për caktimin e prokurorëve si magjistratë udhëheqës në programin e praktikës profesionale dhe për vlerësimin etik dhe profesional cilësor të kandidatëve për magjistratë", magjistrati udhëheqës caktohet për një periudhë prej 3 vjetësh.

Çdo vit, Këshilli kontrollon nëse ai i plotëson kriteret përmes informacionit disiplinor, raportit nga prokuroria dhe vlerësimit nga Shkolla.

Në bazë të këtij kontrolli, Këshilli vendos nëse vazhdohet apo shfuqizohet caktimi si magjistrat udhëheqës.

Magjistrati udhëheqës që ka nën mbikëqyrje një kandidat për magjistrat, nuk merr pjesë në hedhjen e 10-të të shortit për ndarjen e çështjeve, pra ka më pak ngarkesë pune.

Drejtuesi i prokurorisë duhet të kontrollojë zbatimin e këtij rregulli dhe ta marrë parasysh këtë reduktim në vlerësimin vjetor të punës së magjistratit udhëheqës.

Kandidati për magjistrat ka të drejtë për 25 ditë pune pushim vjetor të paguar, prej të cilave 15 ditë gjatë muajit gusht.

Këto 15 ditë pushimi duhet të jenë në të njëjtën periudhë me lejen e magjistratit udhëheqës.

Pushimet caktohen nga drejtuesi i prokurorisë, pasi konsultohet me magjistratin udhëheqës që mbikëqyr praktikën e kandidatit./Monitor