web counter
LEXO PA REKLAMA!

SHKARKO APP

App Store
Google Play

E fundit!

x

Çfarë fshihet pas heshtjes së "Turkish Airlines" për "Air Albania"?

9 Shtator 2025, 13:00, Aktualitet CNA

Çfarë fshihet pas heshtjes së "Turkish Airlines"

“Turkish Airlines”, një nga kompanitë më të mëdha të fluturimeve dhe ndër më prestigjiozet në botë, ndodhet përballë disa skandaleve të njëpasnjëshme, që vijnë lidhur me “Air Albania”-n, “bijëzën” e saj në Shqipëri.

Pse themi skandale?

Themi skandale, sepse ne si CNA, pasi ndoqëm thjesht hapat që bënin disa medie kundër “Air Albania”-s, kuptuam se kush qëndronte pas sulmeve dhe a ishin të vërteta apo pseudoskandale ato që raportoheshin në disa portale periferike. Ishte kompania që po dëmtonte veten? Aksionerët e saj thjesht e falimentuan? Nuk kishte më fonde apo çfarë kishte ndodhur? Këto shkruheshin si sulme apo veprime për të mbuluar skandalet e vërteta.

Çfarë bëmë ne?

Pas lajmit në lidhje me borxhet e mëdha të kompanisë dhe daljen e bilanceve, ne kërkuam në QKB, por aty nuk ishin bilancet dhe i dërguam një e-mail “Turkish Airlines”, por kompania heshti. Edhe audituesit, gjithashtu. Dhe nga aty nuk morëm përgjigje. Dy e-maile, asnjë përgjigje në lidhje me rrjedhjen e bilanceve të “Air Albania”, kur në QKB nuk ekzistonin. Pllakosi heshtja nga kompanitë, por reagimi erdhi.

Ne, jo pa qëllim, i drejtuam një e-email edhe “Big four Ernst & Young (EY)” në lidhje me bilancet e kompanisë dhe me auditimin e tyre. Dërguam një e-mail edhe atje, por sërish heshtje.

Çfarë fshihet pas heshtjes së "Turkish Airlines"
Email i dërguar nga CNA

Ne nxorëm një vendim gjykate, që tregonte dhe zbulonte një abuzim, ndoshta një vjedhje të madhe me miliona euro, që lidhej me kateringun, ku sipas të dhënave, 120 persona në ditë udhëtonin me “business class” me “Air Albania”. Një avion i tërë në ditë “business class”. E pabesueshme! Sërish heshtën.

Pas një shkrimi në CNA, u hodhën të tjera shkrime kundër “Air Albania”-s. U tha se nuk kishte paguar qiratë e avionëve. Një “zbulim” që vinte nga Zvicra.

Ne i shkruam kompanisë ku “Air Albania” kishte marrë avionë me qira, por na thanë me e-mail “NO COMMENT”.

Çdo e-mail kishte pyetje që drejtoheshin në lidhje me çfarë shkruhej për të kuptuar të vërtetën, por të gjithë heshtën, morëm vetëm një koment.

Çfarë fshihet pas heshtjes së "Turkish Airlines"


Përgjigjia nga kompania

A është heshtja miratim?! Pra miratim i së vërtetës që lindte nga pyetjet tona e jo nga shkrimet që dukeshin sikur qëllonin “Air Albania”-n me çifte për të bërë zhurmë e fshehur të vërtetën.

“Turkish Airlines” hesht, skandalet nuk ndalen

“Turkish Airlines” është një nga kompanitë e mëdha botërore që ka shumë “bija”, diku në ortakëri me Gjermaninë, diku në ortakëri me shtetin shqiptar, por ndryshe nga të tjerët, “Air Albania” po goditet e po goditet. U abuzua, u keqpërdor nga menaxherë, drejtues, ish-drejtues, të cilët janë nën strehën e “Turkish Airlines”. Pra, ishte vetë “Turkish Airlines” që e menaxhoi kompaninë në Shqipëri që prej themelimit të saj dhe bilancet sa vinin e rëndoheshin. Rëndoheshin bilancet e një kompanie që i kishin premtuar se do të kishte 7 avionë, por nuk i bëri dot të plotë as dy.

Dikush te “Turkish Airlines” ka qëllime të tjera dhe heshtja flet vetë.

Ndoshta për ta, “Air Albania” dhe humbjet e saj apo falimentimi janë një hiç, por ata avionë mbajnë në bisht flamurin shqiptar. Ata avionë, siç ne kemi shkruar dhe përsëritur, mbajnë në trup emrin “Air Albania”.

Dikush nuk e do bishtin e bukur me flamurin shqiptar.

Ndoshta duan ta falimentojnë, ndoshta duan ta blejnë, por një gjë është e vërtetë: për vite e vite me radhë, ne kemi zbuluar se tek “Air Albania” janë bërë vjedhje e abuzime, që dolën në pah nga një vendim gjykate. Ndoshta ka të tjera.

“Air Albania”, një lopë e mjelë

Drejtues që mund të kenë përfituar dhe abuzuar edhe kur nuk kanë qenë në detyrë. E kanë parë “Air Albania”-n si një lopë për ta mjelë. Dhe pasi e kanë mjelë mirë e mirë, duan që ta ngordhin, ta therin për mish, që ta hanë në tryezë.

Ky duket të jetë qëllimi. Asgjë më shumë se kaq.

Por, a do të munden ta realizojnë këtë qëllim individë të caktuar, për të cilët “Turkish Airlines” hesht?

“Air Albania” është flamuri shqiptar në qiell

Ndoshta ne nuk i interesojmë si media, por ne nuk do të ndalemi deri në ditën që do të marrim përgjigje mbi të vërtetën. Nuk na interesojnë fare fondet e “Turkish Airlines”. Aspak. As se kush janë aksionerët shqiptarë. Na intereson ajo që ne kemi theksuar: flamuri shqiptar në qiejt e Europës, pse jo edhe më tej. Sepse na u tha që do të ishin 7 avionë, me të cilët shqiptarët do të fluturonin nëpër Europë, në Londër, Frankfurt, Paris, Romë, Milano.

Tashmë fluturojnë vetëm te kjo e fundit dhe në Stamboll. Askund tjetër. Pse kompanitë “low cost” duhet të shfrytëzojnë patjetër qiellin shqiptar dhe aeroportet tona, kur ne kemi dhe duhet të kemi kompanitë tona të fluturimeve? Pse “Turkish Airlines” apo individë brenda saj nuk duan që të ekzistojë “Air Albania”? Pse duan ta shkatërrojnë, pasi e vodhën dhe e molën mirë e mirë? Mos ndoshta vallë “Turkish Airlines” hesht se e di që atje ka hajdutëri? Apo ndodhi që dikush gënjen, manipulon dhe fsheh informacionin e duhur, duke i shitur medias në Shqipëri lajme të pavërteta apo gjysmë të vërteta dhe duke ia faturuar kompanisë shqiptare, kur përgjegjësi në fakt është në Turqi te “Turkish Airlines”? Çfarë fshihet?

Nga heshtja e “Turkish Airlines”, mund të themi që ndoshta është një heshtje miratuese për ato që ne kemi shkruar./CNA





Lajmet e fundit nga