“Enver Sheshi ndërroi jetë në rrethana të dyshimta”/ PD bën denocimin: Burgu 313 në Tiranë, pa ngrohje

20 Janar 2023, 15:54, Aktualitet CNA

“Enver Sheshi ndërroi jetë në rrethana të

Sekretari për të drejtat e njeriut në Partinë Demokratike, Bislim Ahmetaj, ka denoncuar kushtet në të cilat mbahen të burgosurit në burgun 313 në Tiranë.

Ai ka deklaruar se ata mbahen pa ngrohje dhe i akuzuari për aferën e inceneratorëve ndërroi jetë në rrethana të dyshimta.

“Sekti i Rilindjes e ka dëshmuar me vepra se dhunimi dhe shkelja e përditshme e lirive dhe të drejtave të shqiptarëve janë një 'hobby' për të, praktikë kjo e trashëguar nga baballarët e tyre, të cilët erdhën në pushtet duke vrarë shqiptarë, e mbajtën pushtetin po duke vrarë, dënuar, torturuar dhe internuar çdo kundërshtar të regjimit të tyre gjakatar.

Në cilësinë e Sekretarit për të Drejtat e Njeriut denoncoj aktin e trajtimit çnjerëzor që po u bëhet të paraburgosurve në burgun 313 në Tiranë.

Edhe pse ka disa ditë që temperaturat në Tiranë kanë zbritur afër zeros dhe lagështia e ajrit ka qenë mbi 82% në mjediset e brendshme të 313-ës, por edhe në institucione të tjera të Ekzekutimit të Vendimeve Penale të vendit, nuk janë ndezur akoma sistemet e ngrohjes.

Sipas Institutit të Shëndetit Publik temperaturat e ulëta dhe lagështia e lartë e ajrit përbëjnë rrezik serioz për jetën e të sëmurëve kronikë me sëmundje kardiovaskulare, koronare, infarktet e miokardit, goditje në tru, sëmundjet e frymëmarrjes, kockave, sëmundjet endokrine, çrregullimet neurologjike si edhe sëmundjet e lëkurës.

Po ky Institut thekson që temperaturat nën 12 gradë deri në 5 gradë përbëjnë rrezik serioz për jetën e bartësve të këtyre sëmundjeve, por edhe për njerëzit me shëndet normal.

Kjo që po ndodh sot në burgjet shqiptare nuk është gjë tjetër veçse një formë e torturës dhe trajtimit çnjerëzor, e ngjashme me kohën e baballarëve të tyre.

Gjithashtu është tregues i një aferë korruptive, pasi fondet për ngrohje janë të planifikuara dhe të derdhura në buxhetin e Ministrisë së Drejtësisë.

I ndjeri Enver Sheshi, i akuzuar për aferën e inceneratoreve, vdiq në mënyrë të dyshimtë para pak ditësh nga një atak i beftë kardiak kur temperaturat në Tiranë ishin 18-20 gradë.

Cilët kanë vënë në shënjestër Edi Rama dhe Ulsi Manja tani që temperaturat e natës në Tiranë kanë rënë në 2-3 gradë?!?

Kush ka urdhëruar për këtë torturë fizike dhe psikologjike që ju bëhet të paraburgosurve në IEVP?!?

Kush i vjedh paratë e destinuara për ngrohjen e IEVP-ve të vendit?!?

Edi dhe Ulsi: ndizni kaldajat e burgjeve se duke ngrirë dhe humbur jetë të burgosurish po digjni shpirtin tuaj në ferr.

Për mbyllje kam një lutje për ambasadoren e SHBA-së, për ambasadoren e BE-së, për Komitetin e Helsinkit dhe Përfaqësinë e OSBE-së në Tiranë: Mjaft nëpër tribuna luksi, shkoni dhe vizitoni burgjet e Tiranës dhe Shqipërisë, siç vepruan pararendësit tuaj në vitet ‘91-’92”, u shpreh ai./ CNA.al