Vrasje me porosi e “klering”/ SPAK zbulon kriminelët përmes “Sky” dhe “EncroChat”

28 Korrik 2023, 21:51, Aktualitet CNA

Vrasje me porosi e “klering”/ SPAK zbulon kriminelët

Informacionet e marra nga dy platforma të cilat mendohej se nuk pergjoheshin kanë qenë një ndër pikat kryesore përmes të cilave SPAK arriti të vinte në pranga një prokuror dhe ish-shefin e Forcave Operacionale në Policinë e Shtetit.

Në dosjen e megaoperacionit “Metamorfoza” rezultohet se përmes këtyre platformave ato jepnin porosi për vrasje apo bënin krime me "klering".

Porosi për vrasje - Anëtarët e grupit kriminal kanë marrë e dhënë porosi për vrasje, dhe kanë raportuar realizimin e tyre në kohë reale përmes platformave “Sky” dhe “EncroChat”. Një rast është porosia e biznesmenit Gjoka ndaj Bejhar Bajrit për një vrasje ku biznesmeni ka pohuar se mund të jepte edhe 110 mijë euro në këmbim.

Krim me “klering”- Nga të dhënat në dosje rezulton se krimi është bërë me “klering” mes grupit të Bajrajve dhe Ervis Martinajt. Njëra palë ka pranuar të kryejë një vrasje për llogari të tjetrës dhe anasjelltas.

Gjithashtu është zbuluar se në një nga vrasjet, autorët i kanë shkuar edhe në varrim viktimës.

Policia dha detaje nga operacioni i zhvilluar me urdhër të SPAK-ut, ku pas përgjimeve u fundos grupi kriminal dhe u arrestuan disa ish-zyrtarë, biznesmenë dhe persona me precedent kriminalë.

Policia bëri me dije se disa prej të arrestuarve janë ish-shefi i Forcave Operacionale, Oltion Bistri, drejtuesi i Prokurorisë së Kukësit, Xhevahir Lita, dhe ish-polici Ardit Hasanbegaj dhe biznesmeni Pëllumb Gjoka.

Konkretisht numri i të vënëve në pranga është 5, ndërsa 9 të tjerë janë shpallur në kërkim.

Sipas SPAK, ky hetim ka zbardhur të paktën gjashtë ngjarje kriminale të ndodhura në vend në periudhën 2019-2022.

Anëtarët e grupit kriminal kishin role të ndryshme dhe dyshohet të jenë përfshirë në vrasjen e Gjin Boriçi Ndojit në gusht 2020 në Shkodër, tentativën e vrasjes së Taulant Pepës në të njëjtin qytet në shkurt 2021, krijimin e kushteve për vrasjen e Kleant Musabelliut në Tiranë në vitin 2020, si edhe atë ndaj Ibrahim Liçit, Dorian Dolit dhe Genc Tafilit në vitin 2020.

Nga operacioni i koduar “Metamorfoza” është ushtruar kontroll në 26 banesa dhe ambjente ku janë gjetur dhe sekuestruar në cilësinë e provës materiale shuma monetare, automjete të ndryshme, telefona, armë zjarri të ndryshme, maska, pajisje elektronike, pajisje elektronike monitorimi (servere dhe kamera) me të cilat monitoreshin ambjente të jashtme në zona të ndryshme të qytetit të Shkodrës./CNA.al