NASA akuzon Kinën për vjedhje të teknologjisë hapësinore

25 Maj 2022, 16:35, Tech CNA

NASA akuzon Kinën për vjedhje të teknologjisë

Agjencia hapësinore e Amerikës, NASA, ka akuzuar Kinën për vjedhje të teknologjisë së paklasifikuar amerikane, duke filluar nga sekretet ushtarake deri te kërkimet mjekësore.

Gjatë një seance dëgjimore të Komitetit të Ndarjeve në Dhomën e Shteteve të Bashkuara më 17 maj, administratori i NASA-s, Bill Nelson, akuzoi Partinë Komuniste Kineze për vjedhjen e sekreteve teknologjike më jetike të Shteteve të Bashkuara, raporton "Singapore Post".

“Po, ata janë shumë të mirë në vjedhje, dhe unë mendoj se kjo është për ne që ta marrim sigurinë kibernetike shumë, shumë seriozisht”, tha Nelson.

Gjithashtu, përfaqësuesi dhe anëtari i komitetit amerikan, Robert Aderholt, vuri në dukje se mjetet hapësinore që po zhvillohen midis kompanive private amerikane dhe organizatave shtetërore kineze kanë ngjashmëri.

“Ne thjesht nuk mund të injorojmë kërcënimin nga Kina dhe kundërshtarët tanë që po bëjnë përparime teknologjike, prodhuese dhe eksploruese çdo ditë”, deklaroi Aderholt.

Sipas qeverisë amerikane, Kina po bën përpjekje për të përvetësuar në mënyrë të paligjshme teknologjitë kritike dhe çdo zhvillim në sektorin e ekonomisë amerikane, veçanërisht ato jetike për përpjekjet për modernizimin ushtarak.

Lidhur me këtë, Sekretari i Forcave Ajrore, Frank Kendall, është shprehur se Shtetet e Bashkuara do të duhet të zhvillojnë armë hapësinore sulmuese për të frenuar kërcënimin.

Ndërkohë, ekspertët e hapësirës ajrore të Kinës dënuan pretendimet e NASA-s, duke theksuar se Kina ka bërë arritje hapësinore përtej SHBA-së.

Akademiku i Akademisë Ndërkombëtare të Astronautikës, Deng Yulin, tha për mediat e huaja se akuza e rreme e Bill Nelson ekspozoi standardet e dyfishta të shefit të NASA-s./ CNA.al