Vërtet Shqipëria mund të përjashtohet nga FIFA dhe UEFA, por ama ne kemi Malumën?!

21 Mars 2022, 18:42, Opinione CNA

Nga Kastriot FRASHËRI

Nga informacionet që kam UEFA dhe FIFA kanë filluar tre ditë më parë të shqyrtojnë situatën absurde dhe pa krye me të cilën e kanë zhytur qarqe të pushtetit ekzekutiv Federatën Shqiptare të Futbollit pas përdorimit të prokurorise dhe gjykatave nga pushteti politik i përfaqësuar nga kryetari i Bashkisë Tiranë për të asfiksuar funksionimin e saj me qëllim për ta marë nën kontroll veprimtarinë e një OJF, e cila sipas ligjit përkatës ushtron aktivitetin e saj e pavarur nga shteti.

Në kushtet kur gjithshka e ndodhur me FSHF ka të njëjtin skenar dhe dirigjent ç’ka detyroi kreun e UEFA, zotin Ceferin të mbrinte me urgjencë në Tiranë dhe të merte garanci nga kryeministri Rama për mosndërhyrjen e qeverisë në çështjet e komunitetit të futbollit, duket se situata është përkeqësuar më tej nga kufizimi që po i behet organeve të zgjedhura të kësaj organizate përmes vendimeve penale gjyqësore.

Duket që skenarët e pushtetit politik ndaj FSHF për ta mare atë nen kontroll nuk mund të kapërdihet lehtë nga qeverisja e futbollit a Europian dhe atij botëror të cilët me sa duket kanë filluar të formalizojnë dy vendime që do të shkatërojnë futbolin shqiptar siç është ai i pezullimit dhe më pas i përjashtimit të Shqipërisë 10 vjet nga të gjitha aktivitetet sportive ndërkombëtare por edhe anullimi i finales së Euro Ligue që do të luhej në Air Albania, që normalisht jo vetëm do të tronditë në mënyrë të pakthyeshme themelet e futbollit shqiptar por edhe ekzistencën e tij.

Natyrisht kjo situatë e rëndë nuk mund të kalojë pa vëmëndjen e qeverisë e cila do të jetë përgjegjëse përpara shqiptarve për situatën e krijuar në FSHF nga segmente të lidhura ngushtë me qeverinë e cila kurësesi nuk mund tu justifikohet shqiptarve me pretendimin se vërtet ne nuk do të luajmë futboll por ama stadiumet mund ti mbushim me Malumën këngëtarin nga Kolumbia. Dhe për këtë kemi pretendenten për zonjë të parë, e cila ka dhënë prova si organizatore e koncertit të tij në Tiranë.

Nëse ndodh kjo tragjedi e paralajmëruar me futbollin shqiptar besoj se nuk mund të mbetet kryesisht një çështje thjesht Turpi për ata që na qeverisin, por do të jetë edhe një ditë shpagimi për autorët përgjegjës të këtij akti të të shëmtuar të cilët sigurisht me apo pa ndihmën e ndonjë gjyqtari me partishmëri të lartë nuk do të dinë ku të fshihen nga revolta e sportdashësve…