Finalja e Conference League, Duka dhe delegacioni i UEFA-s priten në Kryeministri

18 Janar 2022, 17:55, Sport CNA

Finalja e Conference League, Duka dhe delegacioni i UEFA-s priten në

Në kuadër të përgatitjeve për finalen e Conference League, e cila do të luhet në stadiumin ?Air Albania? më 25 maj, ditën e sotme në Tiranë është zhvilluar një takim me përfaqësues të nivelit të lartë.

Sipas asaj që njofton FSHF, delegacioni i UEFA-s i përbërë nga Rémi Decouacon, Thomas Perrot e Denis Bastari i shoqëruar nga Presidenti i FSHF-së, Armand Duka dhe përfaqësues të tjerë të Federatës së Futbollit janë pritur sot në takimin e zhvilluar në ambientet e Kryeministrisë nga drejtues të lartë të institucioneve qeverisë qendrore dhe vendore.

Të pranishëm në këtë mbledhje ishin Sekretari i Përgjithshëm i Kryeministrisë, Ëngjëll Agaçi, Kryetari i Bashkisë Tiranë, Erion Veliaj, Drejtori i Përgjithshëm i Policisë së Shtetit, Gledis Nano, Drejtori i Përgjithshëm Ekzekutiv i Aeroportit Ndërkombëtar të Tiranës, Constantin von Alvensleben si edhe përfaqësues të tjerë nga Kryeministria, Policia e Shtetit dhe Bashkia Tiranë.

Në mbledhje u diskutua për disa çështje duke nisur që nga çështjet e mobilitetit që kanë të bëjnë me finalen e UEFA Europa Conference League në Tiranë, çështje të kapaciteteve akomoduese aeroportuale, kapacitetet e parkimit të fluturimeve çarter, transportin publik në tërësi përfshirë dhe atë Rinas-Tiranë e anasjelltas si dhe çështje të sigurisë.

Sakaq, nga grupi i ekspertëve të UEFA-s u bë një prezantim i të gjitha hapave të mëtejshëm dhe sfidave që priten në 4 muajt në vijim deri në ditën e finales.

Diskutimet do të vijojnë në nivel teknik ku të gjitha institucionet prezente në këtë takim do të kenë përfaqësuesit e tyre për të koordinuar çdo detaj me ekspertët e UEFA-s.