Prokuroria e Tiranës ka nisur zyrtarisht hetimet për falsifikim dokumentesh, bazuar në kallëzimin që biznesmeni Andon Dhima ka bërë ndaj drejtorit të televizionit Top Channel, Ben Blushi. Sipas këtij kallëzimi, Blushi ka bërë në emër të vajzës një kontratë blerje toke, në një kohë që e bija e tij nuk ndodhej fare në Shqipëri.

Ky skandal është denoncuar para disa kohësh nga CNA.al. Bëhet fjalë për një skandal me blerjen e një pasurie me vlerë tregu 500 milionë lekë në qendër të Korçës, në emër të vajzës së ish-politikanit, Ben Blushi, shkruar në kontratën e shitjes vetëm 30 mijë euro.

Në kohën e firmosjes së kontratës në emër të Natali Blushit, kjo e fundit nuk ndodhej në Shqipëri, kjo e vërtetuar sipas të dhënave të sistemit TIMS. (lexo këtu)

Biznesmeni Dhima, i cili së fundmi ishte objekt i një atentati të dështuar, ka kallëzuar penalisht në prokurorinë e Tiranës vajzën e Blushit, Natalia, si edhe noteren Violeta Sulkaj.

Pas këtij kallëzimi, dosja ka mbërritur në zyrën e prokurores Sonila Muhametaj, e cila ka regjistruar procedimin penal dhe ka urdhëruar kryerjen e hetimeve për rastin.
Procedimi për momentin është regjistruar vetëm për faktin penal të kallëzuar, pa përcaktuar ende personat e dyshuar për kryerjen e veprës penale.

Megjithatë, veprimet e shpejta hetimore pritet të identifikojnë me fakte dhe prova autorët e dyshuar.  Hetuesit kanë urdhëruar kryerjen e ekspertimeve grafike, për të konstatuar nëse ekzistojnë elementët e falsifikimit. Gjithashtu, në planin e punës së prokurorisë janë përfshirë edhe pyetja e personave, përfshirë kallëzuesin Andon Dhima, ish-politikanin biznesmen Ben Blushi, vajzën e tij Natalia Blushi dhe noteren Violeta Sulkaj.

Në kallëzim, shitësit e pronave ngrenë akuzat për falsifikim dokumentesh ndaj noteres dhe vajzës së ish-deputetit, lidhur me dy pasuritë e përfituara nga kjo e fundit në Korçë, një bodrum dhe një njësi shërbimi, të dyja me sipërfaqe totale rreth 470 m2. Prona që sipas kallëzimit, janë shitur për 30 mijë euro dhe 5 milionë lekë të vjetra.

“Nëpërmjet një artikulli transmetuar në media, jam vënë në dijeni se Ministria e Drejtësisë ka filluar një hetim administrativ për sa i përket procesit të lidhjes së dy kontratave të lartpërmendura, për shkak se sipas të dhënave të sistemit TIMS … ka rezultuar se pala blerëse Natali Blushi nuk ndodhej në Shqipëri në kohën e lidhjes së kontratave. Referuar të dhënave të sistemit TIMS rezulton se znj. Natali Blushi ka dalë nga Shqipëria në datën 6 prill 2015 dhe është kthyer në Shqipëria në datën 19 qershor 2015, ndërkohë që kontratat janë lidhur në datat 28 dhe 29 maj të këtij viti. Në këto rrethana, nënshkrimi i blerëses Natali Blushi rezulton të jetë i falsifikuar”, thuhet në kallëzimin e depozituar pranë akuzës së Tiranës.
“Sqaroj për organin e akuzës se në lidhje me këtë fakt nuk kam pasur dijeni më parë, pasi kontratat e kam nënshtruar në të njëjtën kohë me palën blerëse, për arsye se jemi paraqitur pranë noteres në momente të ndryshme. Unë, në cilësinë e palës shitëse i kam nënshkruar kontratat e lartpërmendura rregullisht në zyrën e noterisë dhe më pas jam larguar. Kopja ime e kontratave më është vënë në dispozicion nga zyra e noterisë pasi at janë nënshkruar edhe nga pala blerëse, të motorizuara”, sqarohet më tej në kallëzim./CNA.al

Skandali-/ Ben Blushi bëri vajzën pronare duke i falsifikuar firmën (fakte dhe dokumente)